Asturies algama'l primer oxetivu de tener el 70 por cientu de la población cola pauta completa

La presencia de la variante delta aumenta'l porcentaxe necesariu pa la inmunidá de grupu. Esti miércoles rexistráronse 189 casos nuevos.

Asturies va superar güei'l primer oxetivu marcáu de la campaña de vacunación. El 70 por cientu de la población del país va contar cola pauta completa, esto ye, resistencia contra la COVID-19, una cantidá que, sicasí, paez agora insuficiente énte l'apaición de variantes nueves.

La conocida como la india, la delta, ye muncho más contaxosa que la orixinal, la china, lo que lleva a dellos espertos a considerar otros porcentaxes pa llegar a la inmunidá de grupu. La cantidá que más ta sonando agora ye'l 85 por cientu.

Una finada

A falta de la espublización de los datos oficiales de la COVID-19, la Conseyería de Salú comunicó la detección ayeri de 189 casos nuevos. Son 14 más que'l martes, cuando s'informó de 175.

El Serviciu de Salú del Principáu d'Asturies (SESPA) fixo'l miércoles 2.343 pruebes de diagnósticu d'infeición activa, polo que tasa de positividá s'asitió nel 10,16 por cientu, superior al de la xornada previa, cuando foi del 9,05 por cientu con 2.454 tests realizaos. A 7 díes esti porcentaxe taba enantes de l'actualización nel 9,64 por cientu –ayeri xubió al 9,69 por cientu–.

Hebo que llamentar la muerte d'una muyer de 77 años, la 2.026 del andanciu. 92 pacientes tán hospitalizaos con confirmación o sospecha de COVID-19, a los qu'hai que sumar otros 32 ingresaos na UCI, 7 y 3 menos que'l martes, de manera respeutiva.

25 biltos activos

Asturies informó al Ministeriu de Sanidá de la esistencia de 25 biltos activos nel periodu del 2 al 8 d'agostu, 3 más que la selmana pasada, con un total de 330 casos. 6 brotos detectáronse estos 7 díes últimos, comunica la conseyería.

Na semeya, un ciudadanu recibe la vacuna'l mes pasáu nel pabellón xixonés de Perchera-La Braña.