‘El tren que me lleva’, propuesta conxunta de TPA y TVG nes llingües propies pa les feches navidiegues

Per tercer añu TPA y TVG preparen una programación conxunta pa les feches navidiegues col asturianu y el gallegu como llingües vehiculares. Sonia Fidalgo va ser la presentadora asturiana d’una propuesta diferente a les anteriores, un viaxe en tren dende Xixón a Ferrol nel ‘Transcantábrico’ con dellos artistes como compañeros de trayeutu.

A ‘Inimitables: Benvidos / Bienllegaos’, grabáu en Ribadeo, y la visita de ‘Babel’ a ‘Luar’, emitíos nes dos ocasiones el día de Navidá, va siguir esti añu ‘El tren que me lleva’, que se va progamar pa la nueche de la viéspora de Reis. Ta grabándose estos díes y inclúi una actuación de Luz Casal, cantante gallega con un gran venceyu con Asturies, nel Muséu del Ferrocarril d’Asturies.

D’ehí va salir el ‘Transcantábrico’ pa percorrer la vía estrecha que xune Xixón con Ferrol. Como viaxeros, amás de los presentadores Fidalgo y el gallegu Arturo Fernández Álvarez, que van competir sobre cuál país guarda la meyor ayalga, delles artistes, como Marisa Valle Roso o Lucía Pérez.