‘El tren que me lleva’ busca la “perlla del Cantábricu” en TPA y TVG

Na nueche previa al Día de Reis llega per tercer añu’l programa d’hermanamientu ente Asturies y Galicia qu’emiten al empar TPA y TVG. ‘El tren que me lleva’ presenta un formatu diferente a los anteriores, consistente nun viaxe nel 'Transcantábrico' ente Xixón y Ferrol con actuaciones en ruta mientres se busca la “perlla del Cantábricu”.

Alberto Rodríguez y la gallega Mariana Expósito van encargase d’investigar qué país cuenta cola mayor ayalga, pa lo que van percorrer Estaca de Bares, los bancos nel cantil n’Ouviñana y Loiba, los xardinos de Fonte Baxa de Ḷḷuarca, la catedral d’Uviéu, Santo André de Teixido, el paque xeodésicu de Cabo Ortegal, el castru de Cuaña o les delicies gastronómiques que se pueden atopar n’El Cabu Bustu. Dende’l tren, d’onde nun pueden salir, Sonia Fidalgo y Arturo Fernández Álvarez van encargase de conducir esta coproducción, que cuenta col asturianu y el gallegu como llingua vehicular.

‘El tren que me lleva’ pretende amosar la riqueza natural, gastronómica y cultural del trayeutu percorriendo una de les víes históriques de comunicación ente Asturies y Galicia. El viaxe en vía estrecha va empezar con una visita a l'antigua estación de Xixón, sede del Muséu del Ferrocarril d’Asturies, y va concluyir en Ferrol, el llugar onde nació Andrés do Barro, autor de ‘O tren’, el cantar qu’inspira’l títulu d’esta producción, qu’en gallegu ye ‘O tren que me leva’.

La parte musical va ponela Luz Casal, que va actuar nel Museú del Ferrocarril, y Marisa Valle Roso y la gallega Lucía Pérez, que van facelo en marcha. La emisión d'esti programa d'hermanamientu en Navidá va ser simultánea nes dos canales de magar les 22.30 hores.

Na semeya, Marisa Valle Roso nun momentu de la so actuación nel 'Transcantábrico'.