El topónimu ‘ría del Eo’ pasa a ser oficial xunto col de ‘ría de Ribadeo’

|
Ría del Eo y Castropol

L’Instituto Geográfico Nacional (IGN) reconoz el topónimu ‘ría del Eo’ como nome alternativu y col mesmu nivel d’oficialidá y usu que’l de ‘ría de Ribadeo’. Dende’l 2008 ésta yera la única denominación del estuariu d’El Río Eo pa l'Alministración magar que n’Asturies nun s’emplegara.

El Gobiernu treslladara’l pidimientu d’esta modificación llueu de l’aprobación na Xunta Xeneral por unanimidá en payares del 2019 d’una Proposición Non de Llei (PNL) presentada pol PP y recibió güei la notificación del preste del IGN. Según una resolución dictada’l vienres, esta decisión “supondrá la inclusión d’entrambos topónimos en toles bases de datos xeográfiques producíes poles alministraciones públiques integraes nel Sistema Cartográfico Nacional y, en tou casu, nes de l’Alministración Xeneral del Estáu”.

Amás recomiéndase la rotulación conxunta ‘ría de Ribadeo’ y ‘ría del Eo’ cuando la escala lo permita o bien l’usu indistintu de cualesquier de les formas si lo considera l’Alministración productora de la cartografía. La resolución llega llueu de que l’IGN fixera’l procedimientu alministrativo pa oficializar esta denominación doble énte les alministraciones interesaes, esto ye, el Gobiernu d’Asturias, la Xunta y los conceyos de Castropol, A Veiga y Ribadeo.

L’Executivu vien defendiendo la oficialidá del nome emplegáu n’Asturies pa referise a la ría dende que se conociera la decisión del Consejo Superior Geográfico nel 2008 de dar validez namái al términu mayoritariu en Galicia. L’usu de ‘ría del Eo’ apaez rexistráu en documentos oficiales dende’l 1871, ta presente na cartografía del propiu IGN dende’l 1991 y tamién n’otres documentaciones, como l’acta de desllinde y cuadernu asociáu na llinia llende A Veiga-Ribadeo, dende’l 1960.

Na semeya, Castropol y la ría del Eo.

Contador Estadistiques