El ministeriu anula la cooficialidá del topónimu 'ría del Eo' y namái reconoz 'ría de Ribadeo'

Acepta'l recursu presentáu pola Diputación de Lugo, anque nun ye una decisión definitiva.

Una resolución de la Subsecretaría de Tresportes, Movilidá y Axenda Urbana del ministeriu de mesmu nome decidió aceptar les alegaciones gallegues y anular la resolución del Instituto Geográfico Nacional (IGN) que reconoz 'ría del Eo' como nome alternativu y col mesmu nivel d’oficialidá y usu que’l de ‘ría de Ribadeo', l'únicu esistente pa l'Alministración estatal dende'l 2008. El motivu ye un defeutu de forma, polo que s'espera una resolución nueva nel mesmu sentíu que l'agora valtada.

El Gobiernu confirmó en que va insistir nel reconocimientu del nome tradicional que recibe la ría nel llau asturianu. Na parte gallega reivindiquen 'ría de Ribadeo' como topónimu únicu, refugando la doble denominación.

Na imaxe, la ría del Eo nuna semeya antigua, con Castropol a la izquierda y Ribadeo a la derecha.