El Sporting da-y una allegría a la xente de casa

El conxuntu de Marcelino ganó por 4 goles a 1 a un Ciudad de Murcia que dexó a los asturianos facer un partíu guapu y con abondes ocasiones de gol, lloñe del aburrimientu en que vivió'l Molinón los últimos partíos.

El Ciudad de Murcia, que ta a cuatro puntos de la zona de descensu, llegó a Xixón cola conseña de nun dase. De fechu, y anque n'inferioridá los murcianos aguantaron al Sporting a lo llargo de los primeros 35 minutos, hasta que Joao Pinto tuvo la mala suerte de meter cola cabeza pa contra la so portería un centru que mandó ensin munchu convencimientu Ismael dende la carril derecha. Primero d'ello viniere una situación desesperada baxo los palos pal Murcia y un agarrón a Bilic que l'arbitrio nun quixo ver. Y ye que Paradas Asurmendi fizo méritos abondos pa poner al Molinón en contra d'elli, recordando los peores arbitraxes de la so historia col equipu asturianu. D'otrabanda, pela parte del Ciudad de Murcia, hai que dicir que l'equipu visitante foi un rival que xugó y dexó xugar al fútbol, con xugadores mui revolvinos como Camuñas y referencies atrás como l'ex uvieín Manel.

Con ventaya asturiana llegóse al segundu tiempu, qu'entamó con bastiazu murcianu sobre l'área sportinguista. L'ataque visitante duró cinco minutos, los xustos pa que'l linier-y diere al Sporting el penalti que nun se-y quixo pitar nel primer tiempu. Mate Bilic nun falló al marcar la máxima, y el Molinón foi yá una folixa hasta'l final. A favor del Ciudad de Murcia hai que dicir que nunca nun se dio, entamando una xugada tres d'otra cola mira puesta na meta de Roberto, pero ensin suerte nin aciertu contra una defensa na que Dorado y Yago foron les referencies.

Pa mayor desgracia del Murcia, el Sporting sacaba petróleo en cada ataque, y asina llegó'l 3-0, obra de Miguel tres de xugada d'Ismael y Mate Bilic, otra vuelta'l sportinguista más decisivu nos metros últimos. Col Molinón faciendo la fola y cantando l'Asturies Patria Querida, marcelino fizo los cambeos a los que nos tien avezaos, dando-y entrada a Rubén por Bilic, que marchó ente los aplausos d'un Molinón llenu de xente. El pequeñu delanteru asturianu revolvió tolo que quixo nel cuartu d'hora final y marcó'l gol del deliriu sportinguista aprovechando con muncha picardía y dende más de trenta metros, la posición adelantada del rebatiador del Ciudad de Murcia.

Nun final que foi poco menos qu'una pachanga, el Sporting pudo marcar guapamente otros dos goles y el Ciudad de Murcia sí que marcó polo menos el de la vergoña gracies a Godino, pero yá daba too igual. L'equipu asturianu, que sigue a un puntu de la zona d'ascensu, ganó ayeri la moral que tenía perdida.