El segundu ‘Sácame pola pinta’ ábrese a los adultos

El concursu d’imitadores d’artistes asturianos ‘Sácame pola pinta’ va tener edición pa la reciella y pa la xente adulto. Ye ésta la principal novedá d’una iniciativa que tuvo un gran ésitu les Navidaes pasaes y que va repetir los díes 3 y 4 nel Teatru Nuevu de La Felguera.

El Grupo A Mansalva ye l’organizador de ‘Sácame pola pinta’, qu’entovía tien abierta la inscripción pa les dos categorías. La de menores zarra mañana al meudía’l plazu, cola posibilidá d’imitar a Víctor Manuel (‘El cuélebre’), Silvia Quesada (‘La pena abierta’), Fernando Valle Roso (‘La fuente de Cacho’), Marisa Valle Roso (‘Macorina’), Nacho Vegas (‘El Carmín de Pola’), Paula Rojo (‘Si me voy’), Pop Piquiñín (‘Les abeyes’), Tania Pereira (‘Llueve’), Truequedart (‘Puedes ver el sol’), Nuberu (‘Nel Pozu María Luisa’), Nando Agüeros (‘La Santina’), El Presi (‘Si yo fuera picaor’), Los Berrones (‘Nun yes tu’), Rodrigo Cuevas (‘Viva Grecia’), La Bandina (‘A la vera de Borín’) y La Pastorina (‘Asturianos emigrantes’).

Na estaya d’adultos, la inscripción ta abierta hasta’l llunes al meudía, con un llistáu pa escoyer ente Alfredo González (‘La nada y tu’), Víctor Manuel (‘La romería), La Bandina (‘Na caleya’), Tino Casal (‘Eloise’), Los Berrones (‘Chacho’), Los Stukas (‘Atrapado’), Silvia Quesada (‘De llonxe gano’), Nuberu (‘Chalaneru’), Dixebra (‘Nacionaliega’), Melendi (‘La mi mozuca’), Rodrigo Cuevas (‘Ritmu de Verdiciu’), Danny Daniel (‘El vals de las mariposas’), Hermanos Valler Roso (‘Mocina dame un besín’), Dark la eMe (‘Asturiano en Madrid’), La Pastorina (‘Yá suena la gaita’) y Mariluz Cristóbal (‘Soi vaqueira’). El vencedor va llevar 1.000 euros de premiu, mentes que’l ganador del votu del públicu 300 euros en conceptu de clases na Escuela de Música d’A Mansalva, recompensa que nel casu de los pequeños y pequeñes va ser la grabación d’un discu promocional de 4 cantares nun estudiu de profesional con acompañamientu instrumental y tamién 300 euros en clases, de manera respeutiva.

Pa pasar a la final ye necesario unviar un videu d’un llargor máximu d’un minutu imitando al artista nel cantar escoyíu al traviés del WhatsApp del númberu de teléfonu 667.252.611 xunto col nome, los apellíos y señes del concursante amás d'una foto del DNI por dambes cares, y teléfonu y corréu electrónicu, del tutor llegal nel casu de los menores. Namái se contempla la participación de solistes o dúos y, nel casu de la imitación de grupos, ésta va centrase namái nel cantante, ensin ser necesario que se coincida nel sexu.

La gala d’adultos va celebrase’l miércoles 3 de xineru a les 19.30 hores, mentes que’l de menores va tener llugar al día siguiente. Toles actuaciones van colgase en Facebook pa proceder al votu del públicu al traviés de ‘meprestes’.