El rellator de la ONX ve faltes nos derechos llingüísticos de les minoríes del Estáu y cita la falta d’oficialidá n’Asturies

|
Fernand de Varennes

Fernand de Varennes, Rellator Especial de Naciones Xuníes (NN XX) sobre Cuestiones de les Minoríes, fixo públicu un documentu coles sos observaciones preliminares de la so visita al Estáu. Nél apunta que vio faltes na realización efeutiva de los derechos llingüísticos de les minoríes, sobre manera nes aquelles comunidaes, “como n’Asturies”, onde l’idioma “nun gocia d’estatus oficial”.

Del 14 al 25 de xineru, convidáu pol Gobiernu estatal, el canadiense visitó dellos territorios como Galicia, Andalucía, Catalunya, Euskadi o la Comunidad de Madrid, y aconceyó con representantes d’ONG “que trabayen pa (o representen a) les comunidaes asturiana, balear, vasca, catalana, gallega y valenciana, representantes de minorías musulmanes y xudíes, inmigrantes de Marruecos y otros”, esplica nesti documentu. Nel casu asturianu, entrevistóse con Inaciu Galán, presidente d’Iniciativa pol Asturianu, que-y treslladó la situación del asturianu y del lleonés nel ámbitu educativu, nos medios de comunicación públicos y, sobre manera, nel ámbitu llegal.

No que respeuta a los derechos minoríes llingüístiques –entiendése como ‘minoría’ cualquier grupu llingüísticu, relixosu o étnicu que cuente menos de la metá de la población del Estáu– esplica que “España realizó avances significativos” mientres “la transición a la democracia, y estableció comunidaes autónomes qu’en gran midida pudieron poner en práutica de forma práutica y realista” los derechos d’estes minoríes “al  usu del so idioma nes sos interaiciones coles autoridaes y instituciones estatales cuando sía razonable y xustificao, nun grau apropiáu en proporción a la so población. Sicasí, avanza que “l’informu completu considerará más detenidamente una serie d’árees nes que pue haber faltes na realización efeutiva d’estos derechos, en particular na Educación, l’aplicación de la llei y el poder xudicial, asina como los derechos de les persones con  idiomas minoritarios qu’alcuentren fuera d’estes comunidaes, y en particular aquelles que nun gocien d’estatus oficial, que pueden ser particularmente difíciles d’afirmar, como n’Asturies y Navarra”.

L’informe definitivu, pa marzu del 2020

De Varennes va ponese agora a trabayar nel informe definitivu sobre la situación de los derechos de les minoríes nel Estáu que presentará mientres el periodu de sesiones del Conseyu de Derechos Humanos de las Naciones Xuníes de marzu del 2020. Hasta setiembre va tener en cuenta les contribuciones de toles persones y organizaciones interesaes.

Sobre’l restu de cuestiones, en xeneral, el rellator de la ONX destacó los “enormes avances llograos por España nel campu de los derechos humanos dende que se transitó hacia una democracia nel periodu de 1977-78, que “nun siempre s’aprecian o reconocen dafechu”. Asina, considera que “a lo llargo de los años, algamáronse munchos avances llexislativos, institucionales y de polítiques n’árees como la proteición de los derechos humanos, la violencia de xéneru y la inclusión de les comunidaes xitanes, anque munchos d’estos avances viéronse trabaos pola grave crisis financiera de 2008-2014”, amás del desarrollu de “iniciatives innovadoras p’ayudar a meyorar y integrar a un númberu cada vegada mayor de migrantes y estranxeros que lleguen y se queden n’España, como marroquines y rumanos, qu’inclúin el proporcionamientu d’información y asistencia nos sos idiomes”.

Contador Estadistiques