El rellator de la ONX sobre minoríes va ellaborar un informe sobre los derechos llingüísticos n’Asturies y Lleón

Fernand de Varennes, Rellator Especial de Naciones Xuníes (NN XX) sobre Cuestiones de les Minoríes, ta de visita oficial nel Estáu. Na so xira atropó información sobre la situación de los derechos llingüísticos n’Asturies y Lleón pa la ellaboración d’informe.

Dende’l día 14 y hasta mañana’l canadiense ta percorriendo dellos puntos del Estáu p’analizar la situación de coleutivos minoritarios nel país, tamién los llingúísticos. El sábadu pasáu sacó tiempu p’aldericar con Inaciu Galán, presidente d’Iniciativa pol Asturianu, que-y esplicó la situación del asturianu nel ámbitu educativu, nos medios de comunicación públicos, y sobre manera nel ámbitu llegal, dando-y datos sobre la falta de reconocencia oficial n’Asturies y Lleón del idioma, como establez l’artículu 3.2 de la Constitución Española.

El periodista y escritor quedó con De Varannes nesta conversación entamada por mediación d’European Language Equality Network (ELEN), a la que pertenece Iniciativa pol Asturianu, en tresllada-y dellos informes propios y d’otres entidaes que-y van permitir completar la información facilitada pa emitir un informe sobre la situación de los derechos llingüísicos n’Asturies y Lleón. El Rellator Especial tien el mandatu del Conseyu de Derechos Humanos de la Organización de Naciones Xuníes (ONX) d’esaminar y superar les torgues a la realización de los derechos de les persones pertenecientes a minoríes, identificar les meyores práctiques, aplicar una perspeutiva de xéneru y afalar la declaración sobre los derechos de les persones pertenecientes a les minoríes nacionales o étniques, relixoses y llingüístiques.