El PSOE presenta una moción de censura a Rajoy y Ciudadanos esixe la convocatoria d’eleiciones

|
Pedro Sánchez

Pedro Sánchez ta nestos momentos tratando de sumar apoyos a la moción de censura que’l PSOE presentó esti vienres tres la sentencia de la primer parte del ‘casu Gürtel’ que condena’l PP por corrupción. Ciudadanos esixe a Rajoy que convoque eleiciones.

Adrián Barbón, secretariu xeneral de la Federación Socialista Asturiana (FSA), yá demandaba ayeri la presentación de la moción de censura y el PSOE daba’l pasu esta mañana. Tamién Xuníos Podemos amosábase favoratible ayeri a la mesma y confirmaba qu’apoyaría a Sánchez nel casu de qu’apostara por ella.

Los votos de dambes formaciones nun son suficientes pa que la segunda moción de censura que va tener qu’afrontar Mariano Rajoy nesta llexislatura salga alantre, polo que Sánchez ta tratando de sumar apoyos entes les formaciones nacionalistes pa llegar a los 176 diputaos necesarios. Ciudadanos, pela so parte, confirmó que nun va sofitar la iniciativa socialista, esixe al presidente del Gobiernu estatal que convoque eleiciones y va presentar una moción de censura instrumental propia, que decidirá’l llunes nun conceyu del executivu del partíu, nel casu de que’l popular nun dea esi pasu.

"Ye mala pa España y pa los españoles"

El presidente del Gobiernu estatal compareció en rueda de prensa a les 14 hores y refugó la moción de censura, que considera que "ye mala pa España y pa los españoles", asina como l'adelantu d'eleiciones. Acusó a Sánchez d'emplegar la oportunidá pa querer ser presidente del Estáu y apuntó que nengún miembru del Executivu ta condenáu pola Gürtel.

Contador Estadistiques