El Partido Popular (PP), primer partíu políticu condenáu por corrupción

La sentencia pola primer parte del ‘casu Gürtel’ (1999-2005) convierte al Partido Popular (PP) nel primer partíu políticu del calter estatal condenáu por corrupción dende la llegada de la Democracia. La formación nel Gobiernu ha de pagar dos multes por 245.492 euros pola so implicación na trama a títulu d’arriquecimientu.

L’Audiencia Nacional estima asina que’l PP se benefició, como persona xurídica, de manera irregular de dineru de procedencia ilícita, polo que-y impón la devolución d’una cantidá económica, y reconoz la esistencia d’una caxa B nesti partíu políticu dende, al menos, 1989. El tribunal considera que los delitos de la Gürtel produxeron perres pa la financiación illegal d’actividaes de la formación popular y dellos actos políticos en campaña y precampañes eleutorales de los sos candidatos.

En total, el xuiciu pola primer parte de la trama, correspondiente al periodu de tiempu d’ente los años 1999 a 2005, condena a 29 de los 35 acusaos, siendo la mayor pena pal so cabezaleru, Francisco Correa: 51 años y 11 meses. A Guillermo Ortega, ex alcalde de Majadahona, caen-y un total de 38 años, mentes qu’a Pablo Crespo, consideráu númberu 2 y ex secretariu d’organización del PP de Galicia, 37 años y 6 meses; y al ex ayalgueru Luis Bárcenas, 33 años y 4 meses, y una multa de más 44 millones d’euros, polos 14 años y 8 meses de la so esposa, Rosalía Iglesias.

La ex ministra de Sanidá, Ana Mato, finalmente ha de pagar una multa de 27.857,53 euros por beneficiase con viaxes y celebración d’eventos familiares.