El PSOE gana les eleiciones n’Asturies

El partíu más votáu n’Asturies y nel Estáu nes eleiciones del 28-M resultó’l PSOE, que llevó 3 de los 7 escaños que-y correspuenden a Asturies. PP-Foro rexistró una baxada de 18 puntos, tando a punto de ser superáu por Xuníes Podemos, formaciones que sumen un diputáu, al igual que Ciudadanos y VOX, qu'entra nel Congresu.

Col 99,93 por cientu escrutáu, la candidatura liderada por Adriana Lastra algamó un 33,13 por cientu de los votos (24,87 por cientu nel 2016) por un 17,91 por cientu de PP-Foro (35,25) y un 17,15 por cientu de Xuníes Podemos (23,85). D’esta forma, el PSOE gana un parllamentariu pa sumar 3, mentes que la coalición conservadora pierde dos y la morada otru.

Xube Ciudadanos, d’un 12,60 por cientu a un 16,71, que-y sirve pa caltener el so escañu. Mentes, la ultraderecha, con un 11,50 por cientu (0,24 nel 2016), saca representación por Asturies VOX.

D’esta forma, los representantes de les asturianes y asturianos nel Congresu van ser Los representantes de los asturianos nel Congresu van ser Adriana Lastra, María Luisa Carcedo y Roberto García Morís (PSOE), Paloma Gázquez (PP) Sofía Fernández Castañón (Podemos), José Ignacio Prendes (Ciudadanos) y José María Figaredo (VOX). D’esta forma, el forista Isidro Manuel Martínez Oblanca pierde’l so acta de diputáu.

La participación foi del 73,35 por cientu, mui superior a les anteriores, onde se rexistró un 61,09 por cientu. Un 1,09 por cientu de los votos foron nulos, mesmu porcentaxe qu'algamó'l votu en blancu.

Tamién nel Senáu

No que respeuta al Senáu, con un 89,32 por cientu escrutáu, el PSOE tamién ye vencedor con 3 de los 4 escaños a los que tien derechu Asturies nes urnes –los otros dos son representación de la Xunta Xeneral–. Los socialistes Francisco Antonio Blanco, María Fernández Álvarez y Fernando Lastra son los escoyíos, xunto col popular José Ramón García Cañal, quedando tamién fuera la representante de Foro.

Necesidá de pautos

A nivel estatal, col 99,41 por cientu escrutáu, el PSOE suma 123 escaños, polo que necesitará pautar pa gobernar. La derecha, mentes, nun suma la mayoría necesaria pa impedir que Pedro Sánchez siga al frente del Gobiernu.

El PP suma 66 diputaos; Ciudadanos, 57; Xuníes Podemos 35, a los qu’hai que sumar los 7 d’En Comú Podem-Guanyem El Canvi; VOX, 24; ERC-Sobiranistes (15), Junts per Catalunya (7), EAJ-PNV (6), EH Bildu (4), Coalición Canaria-PNC (2), Navarra Suma (2), Compromís (1) y PRC (1).

Na semeya, Lastra en Madrid dando la so valoración de los resultaos eleutorales.