El PSOE, decidíu a gobernar en solitariu

|
Pedro Sánchez y Adriana Lastra celebración eleiciones 28-A

El partíu ganador de les eleiciones estatales, el PSOE, con 123 escaños, ta decidíu a gobernar en solitariu. El posible pautu a la derecha con Ciudadanos ta descartáu pola negativa del partíu naranxa, mentes que los socialistes nun valoren de momento mirar hacia la izquierda y negociar con Xuníes Podemos.

La vicepresidenta en funciones, Carmen Calvo, espresó esta mañana la posición del so partíu, que va en llinia a lo amosao por Pedro Sánchez mientre la campaña. Nesi mesmu sen tamién se manifestó Cristina Narbona, presidenta del PSOE.

El pautu más cenciellu pa los socialistes por motivos de gobernabilidá y aritmética sería con Ciudadanos, tercer partíu más votáu, qu’algamó 57 escaños. Ente les dos formaciones sumen 180, más de los 176 que marquen la mayoría absoluta nel Congresu.

Sicasí, esta opción foi refugada esta mañana por Inés Arrimada, confirmando asina’l compromisu dau por Albert Rivera en campaña de nun pautar de nenguna manera con Sánchez. Les bases del PSOE nun apoyaríen tampoco esta posibilidá, como se pudo ver na intervención del presidente en funciones na celebración del trunfu eleutoral en Ferraz.

Otros posibles pautos

Les otres posibilidaes que tienen el PSOE tán a la izquierda y pasen a un alcuerdu con Xuníes Podemos, cuarta fuercia con 35 escaños, polo que sumaríen 158. Incorporar al mesmu a formaciones nacionalistes como ERC-Sobiranistes (15) o partíos non independentistes tampoco nun paez que pueda prosperar.

Mentes, el bloque de dereches formáu por PP (66), Ciudadanos y VOX (24) queda en 147, 149 si s’añade tamién a la coalición Navarra Suma, lloñe de la mayoría absoluta que pretendía.

Na semeya, Sánchez, con Adriana Lastra a la so izquierda, na celebración de Ferraz. Xunto a la candidata asturiana, Narbona y Calvo.

Contador Estadistiques