El PSOE d’Avilés elimina l’únicu artículu referente al asturianu del Reglamentu Orgánicu Municipal

El proyeutu del Reglamentu Orgánicu Municipal (ROM) d’Avilés pierde "l’artículu númberu 19", l’únicu que facía referencia al emplegu del asturianu. Somos critica esta decisión del PSOE y alerta de que provocaría inseguridá xurídica nel usu del idioma.

“El ROM ye ún de los elementos llegales más importantes pal funcionamientu formal nos ayuntamientos, yá que ye'l que regula los procedimientos alministrativos de los órganos que los formen, les atribuciones de caún d'ellos o les competencies d'Alcaldía y del Plenu, ente otres munches cuestiones”, espliquen dende la candidatura de xunidá popular. L’actual en vigor ye del añu 1988 y propúnxose la so anovación pol so avieyamientu, al entender que nun respondía a les necesidaes actuales d'un ente llocal como l'avilesín.

La sorpresa vieno cuando’l proyeutu presentáu pol PSOE eliminaba l'únicu artículu "d'esti testu normativu que fai referencia a la llingua asturiana”. Ésti, de nome ‘Lengua. Acuerdos. Pleno’, recoyía en castellanu que “les convocatories de les sesiones, los órdenes del día, mociones, votos particulares, propuestes d’alcuerdu y dictámenes de les Comisiones Informativas redautaránse en too casu en llingua castellana. Asinamesmo, previu alcuerdu plenariu nesi sen tamién se podrán redautar en bable. Nos alderiques podrán utilizase indistintamente la llingua castellana o’l bable, si bien nesti casu al acta trescribiránse les intervenciones en castellanu”.

“Cuando pensábemos que diba aprovechase la ocasión pa correxir la so redaición y actualizalu, dotando a la llingua asturiana de más entidá y derechos, alcontrámonos con que'l PSOE avilesín opta directamente por suprimilu ensin nenguna otra alternativa. Esti pasu atrás con respeuto al testu del añu 1988 supón una inseguridá xurídica p'aquellos grupos y conceyales qu'usamos l'asturianu de manera avezada nes nuestres comunicaciones escrites y orales, quedando esta circunstancia al caprichu de la máxima autoridad local, esto ye, d'Alcaldía”, avisa Somos Avilés, que llamenta que’l PSOE llocal “vuelven a posicionase a la contra de los tiempos nuevos que cuerren na dirección executiva de la Federación Socialista Asturiana, que nel so últimu congresu aprobaba la so posición favoratible pa cola oficialidá del asturianu”.