El procedimientu del B2, interrumpíu na fase de pagu de tases, va siguir cuando fine l’estáu d’alarma

|
IES Carreño Miranda

La prueba de certificación d’asturianu adaptada al Marcu Común Européu de Referencia pa les Llingües, convocada en principio pa últimos de mayu, caltiénse. La Conseyería d’Educación confirmó que’l procedimientu del B2, interrumpíu na fase de pagu de tases, va siguir cuando fine l’estáu d’alarma declaráu pol Gobiernu estatal.

Dada la situación de crisis sanitaria pola COVID-19, les primeres feches afitaes pa esti esame, del 21 al 29 mayu, podríen baillar, pero la celebración de la primer prueba tres l’aprobación l’añu pasáu del decretu qu'afita los niveles de competencia nel usu de la llingua asturiana, a la que se presentaron cuasi 800 persones, ta garantizada. De momento, la previsión ye que’l procesu siga’l so cursu cuando se llevanten les restricciones actuales de movilidá, al igual que tolos restantes entamaos dende la Direición Xeneral d’Ordenación, Evaluación y Equidá Educativa.

Nel casu del B2 d’asturianu yera’l pagu de tases y entrega del xustificante nos cuatro centros d’inscripción asitiaos n’Uviéu (IES Aramo), Xixón (IES Calderón de la Barca), Avilés (IES Carreño Miranda) y Mieres (IES Bernaldo Quirós). Una vegada se torne a la normalidá controlada la pandemia pol cuenta’l coronavirus SARS-CoV-2, la conseyería anunciará los plazos nuevos pa executar esta operación qu’han de facer les 500 persones con plaza.

Na semeya, l'IES Carreño Miranda d'Avilés, ún de los cuatro centros d'inscripción onde entregar el xustificante del pagu de les tases del esame.

Contador Estadistiques