El primer tomu del Diccionariu Etimolóxicu de la Llingua Asturiana yá ye una realidá

Preséntase'l xueves na Universidá d'Uviéu.

Xosé Lluis García Arias ye l'autor del Diccionariu Etimolóxicu de la Llingua Asturiana (DELLA), obra cimera d'una importancia comparable a la del Diccionariu de la Llingua Asturiana (DALLA). "Ye ensin dulda la obra científica de más altor rellacionada cola llingua asturiana y la so filoloxía y marca’l finxu cimeru no que ye la descripción científica del idioma asturianu", espresen dende l'Academia de la Llingua Asturiana (ALLA), editora de la obra xunto cola Universidá d'Uviéu.

L'ex presidente de la institución académica va presentar el primer tomu del so trabayu'l xueves, a les 10 hores, nel Paraninfu de la Universidá d'Uviéu, actu nel que tamién va participar l'actual cabeza visible de l'ALLA, Xosé Antón González Riaño, y el rector Santiago García Granda. Michael Metzeltin, caderalgu de Filoloxía Románica de la Universität Wien y ún de los máximos espertos mundiales nel estudiu de les llingües romániques, va poner la conferencia central del eventu.