“El Diccionariu Etimolóxicu ye un preséu fundamental que coloca a Asturies nel mundu”, afirma González Riaño

El xueves va presentase na Universidá d’Uviéu’l primer tomu del Diccionariu Etimolóxicu de la Llingua Asturiana (DELLA), “un preséu fundamental que coloca a Asturies nel mundu”, asegura Xosé Antón González Riaño, presidente de l’Academia de la Llingua Asturiana (ALLA). El so autor de Xosé Lluis García Arias.

Pendiente entovía d’aspeutos como’l diseñu, esta obra editada pola ALLA y la Universidá d'Uviéu con décades de trabayu detrás “tará compuesta por ente seis y ocho tomos”, calcula González Riaño, siendo’l primeru’l qu’incluya les pallabres qu’empiecen poles lletres ‘A’ y ‘B’. “Toles llingües romániques tienen munches pallabres qu’empiecen por ‘A’, lo qu’esplica qu’esti tomu recueya namái dos lletres”, apunta.

Les entraes del DELLA va incluyir la pallabra, el so orixe etilomóxicu “y dalgo mui importante, documentación de testos onde apaez per primer vez”, una carauterística que convierte a esti diccionariu etimolóxicu diferente a otros. Tamién inclúi, si se da’l casu, les variantes que tien el términu.

Una carta de presentación científica

Gonzáleza Riaño, pa dar entender la importacia que tien pal asturianu’l contar con un diccionariu etimolóxicu, esplica que “dende la perspeutiva social, pa una llingua ye clave contar con una gramática normativa y un diccionariu normativu, que yá tenemos, que permiten el so usu con enclín comunicativu. Dende una perspeutiva filolóxica, de prestixu de la llingua, ye clave un diccionariu etimolóxicu, que ye la carta de presentación científica de más altor pa mostrase como tal. Poro, el Diccionariu Etimolóxicu ye un preséu fundamental que coloca a Asturies nel mundu”. Nesi sen, nel Estáu namái tienen un trabayu d’esti calter el castellanu y el catalán.

La presentación del primer tomu va celebrase el xueves, a les 10 hores, nel Paraninfu de la Universidá d'Uviéu, actu nel que tamién va participar l’autor y el rector Santiago García Granda. Como convidáu pola ALLA va tar tamién nel edificiu históricu universitariu Michael Metzeltin, caderalgu de Filoloxía Románica de la Universität Wien, miembru d’honor de la institución académica y autor del ‘Lexikon der Romanistischen Linguistik’, “obra fundamental de la romanística”, que va poner una conferencia sobre’l DELLA.