El presupuestu del país será un 4,1 por cientu mayor que’l del 2015

El Conseyu de Gobiernu aprobó un proyeutu de presupuestos de 4.121 millones d’euros pal 2016. Ésti cuenta col sofitu del grupu parllamentariu d’IX y la intención de la FSA-PSOE ye llegar tamién a un alcuerdu con Podemos pa poder sacalu alantre.

Según los datos aportaos pol Gobiernu, el gastu social previstu pal 2016 algama los 2.840 millones, siendo un 69 por cientu del total del presupuestu, mentes que la inversión asítiase en 302,7 millones. El gastu non financieru asciende, pela so parte, a 3.686 millones.

De los 2.840 millones de gastu social, Sanidá va llevar 1.653 millones, lo que supón el 40,1 por cientu de las cuentes, mentes qu’a Educación va destinase 761 millones, el 18,5 por cientu. Esta partida inclúi 653.000 euros pa la convocatoria de les oposiciones docentes anunciaes pol conseyeru Genaro Alonso y l’aumentu de los fondos destinaos a formación profesional.

Novedaes fiscales

Ente les novedaes previstes ta la creación de dos impuestos medioambientales “ensin afán recaudatoriu y col oxetivu d’incentivar l’actuación ambiental responsable y contribuyir a la proteición del mediu ambiente”. Asina, afítase un impuestu sobre les bolses de plásticu d’un solo usu “pa disminuir la utilización d’esti tipu de bolses, incentivar conductes responsables y reducir la contaminación” y otru sobre la eliminación de residuos en basureros. Ésti últimu naz pa “fomentar el reciclaxe y reducir l’impautu que xenera la eliminación de residuos nos basureros”, cola particularidá de que pa los residuos de naturaleza industrial entraría en vigor el 1 de xineru del 2017.

A estes midíes súmase la modificación nel impuestu de sucesiones y donaciones. “Establezse una mengua de 150.000 euros a toles herencies en llinia direuta. D’esta manera, los primeros 150.000 euros qu’herede too contribuyente de los grupos I y II –herederos en llinia direuta– nun tributarán. Corríxese con esta midida el conocíu como ‘error de saltu’. Amás, col oxetivu de meyorar la progresividá del tributu, modificaránse los tramos de la tarifa –calteniendo los tipos– pa evitar que les correiciones beneficien a les herencies más altes”, espliquen dende’l Gobiernu.

Por demanda d’IX

Tanto la creación de los impuestos ambientales como la modificación nel impuestu de sucesiones y donaciones  lleguen por demanda d’IX nes negociaciones de los presupuestos del 2016, con alcuerdu col grupu parllamentariu d’IX a la espera de l’aprobación definitiva por parte de la organización. D’esta forma, los socialistes contaríen col votu 19 de los 45 parllamentarios de la Xunta Xeneral, polo que deberíen sumar un sociu más pa poder sacalos alantre. Asina, la FSA-PSOE tien puesta la mirada en Podemos, formación que treslladó nos alcuentros ente dambes formaciones delles propuestes col oxetivu de facer d’ellos “una ferramienta de tresformación y reorientación de les polítiques n’Asturies”, según apuntó Emilio León, voceru de Podemos Asturies.

Pa la so aprobación sería, poro, necesariu l’apoyu de Podemos o la so astención cuando éstos se voten na Xunta Xeneral, previsiblemente nos díes últimos del añu. El 23 d’avientu, tres les eleiciones estatales, ta prevista la celebración del debate de la enmienda a la totalidá de les cuentes. De nun haber alcuerdu final, habría una prorroga presupuestaria, dalgo que la FSA-PSOE evitó l’añu pasáu gracies a un pautu col Partido Popular (PP). El presupuestu pal 2015 ascendió a 3.959 millones d’euros.

Na semeya, momentu nel que Dolores Carcedo, conseyera de Facienda y Sector Públicu, entrega’l proyeutu de presupuestos pal 2016 al presidente de la Xunta Xeneral, Pedro Sanjurjo. Imaxe obra d'Armando Álvarez.