El PP alvierte que’l déficit va obligar a un axuste ensin precedentes
|
28 Febreru, 2012 por E.P. / Redacción
- Inicie sesión o rexístrese pa espublizar comentarios
Alfonso Alonso, voceru del PP nel Congresu, alvirtió que’l Gobiernu va tener qu’aplicar recortes ensin precedentes por mor del déficit. El balance contable de l’Alministración sitúalo nun 8,51 por cientu, lloñe del 6 alcordáu cola XE.
"Esto –el déficit– va obligar a un esfuerzu y a un exerciciu de responsabilidá, que nun tien precedentes, per parte de tol mundu. L'añu pasáu foi un añu desastrosu. Les previsiones del Gobiernu provocaron una situación irreal d'engañu", argumentó en declaraciones a Catalunya Radio. Almitió que los nuevos axustes van afeutar "la cartera de servicios públicos", ente ellos la sanidá, anque descartó qu'implantar el copagu sía una solución a plazu curtiu.
Alonso tamién esplicó que nel Congresu yá se plantegó crear una comisión sobre la financiación de la sanidá, pero avisó que la crisis va obligar a tomar decisiones con rapidez sobre esti ámbitu. D’igual forma, avanzó que'l Gobiernu va anunciar esti capítulu de recortes a lo llargo del mes qu'entra y primero que se dean a conocer los presupuestos del 2012, una presentación prevista pal vienres 30 de marzu, cinco díes depués de les eleiciones andaluces y de les anticipaes asturianes.
Efrén d'Andrés
Lo + visto de la selmana
Comentarios
El déficit tamién se recorta tomando midíes que faigan qu'aumenten los ingresos. Arremetiendo escontra'l fraude fiscal. Aplicando tases a les transaciones financieres internacionales (tasa Tobin) . Subiendo los impuestos a les grandes fortunes. Acabando colos paraisos fiscales. Prohibiendo o grabando les transaciones especulatives con derivados y futuros. Prohibiendo las SICAV (fondos de renta variable que tienen los ricos- mas de 2.400.000,- EU- que tributen al 1%). Subiendo'l Impuesto de Rentas de Capital (IRC), polo menos al mesmu tipu que les rentes de trabayu. Prohibiendo o grabando muncho más les transaciones especulatives nos mercaos de renta fixa o variable ( plusvalíes orixinaes por compra-venta d'activos financieros en tiempos cortos). Retomando'l impuestu de patrimoniu y de sucesiones. Revisión del impuestu de sociedaes con una xuba especial a les entidaes financieres y tresnacionales.
Estes midíes asina como una meyor xestión del gastu públicu y llucha escontra la corrupción ye lo que diferencia a quien defende los intereses de la mayoría social (99%), de quien defende los intereses d'una minoria especuladora que ta representada polos nomaos mercaos financieros y les tresnacionales.
Lo de los paraísos fiscales ta perbién. Non sabemos se "Rajoiciño"-y lo diría a Cameron cuando-y foi facé-la rosca hai unos díes.