El Plenu de Noreña aprobará'l día 31 la ordenanza d’asturianu modificada tres l’anulación del TSXA

Once meses depués de la introducción nel Rexistru de la ‘Ordenanza Municipal pal Usu de la Llingua Asturiana nel Conceyu de Noreña’ modificada depués de l’anulación de la mesma pol TSXA, va dir a Plenu pa la so aprobación. Va ser nel de xineru, el día 31.

Independientes por Noreña (IPÑ), Conceyu Abiertu por Noreña –formación impulsora de la iniciativa–, Izquierda Xunida (IX) y Foro son les formaciones que sofiten la redaición nueva de la ordenanza, cola que se pretende salvar la interpretación que’l Tribunal Superior de Xusticia d’Asturies (TSXA) facía de la referencia del testu al asturianu como llingua propia del conceyu, lo qu’entendía como una declaración d’oficialidá. Mañana va tratase'l testu modificáu na Comisión de Cultura, pasu previu pa llevar el mesmu'l xueves viniente al Plenu de xineru.

L’abogáu Ignacio Fernández encargóse de redautar los cambios necesarios, que se centren en dalgunos artículos. Tamién s'acompaña la ordenanza d'un informe económicu, un requisitu al qu'obliga la llei y que tamién se citaba nos motivos d'anulación del documentu na sentencia del TSXA.