El pidimientu d’un informe xurídicu a Secretaría retrasa l’aprobación de la ordenanza d’asturianu de Noreña

PP, PSOE y IX solicitaron a Secretaría la ellaboración d’un informe xurídicu sobre’l conteníu de la ‘Ordenanza Municipal pal Usu de la Llingua Asturiana nel Conceyu de Noreña’, pidimientu que tuvo’l preste d’IPÑ, lo que va retrasar la so aprobación. Nun primer momentu taba previsto que se llevara al Plenu ordinariu de xineru.

Esta mañana celebróse la Comisión de Cultura, que s’allargó pol alderique xeneráu pola ordenanza. Un informe ellaboráu pola téunicu d’Alministración Xeneral del Conceyu, que cuestionaba dellos puntos del testu redautáu pol abogáu Ignacio Fernández depués de que l’orixinal aprobáu en Plenu fora anuláu pol Tribunal Superior de Xusticia d’Asturies (TSXA), nun se consideró válidu al tener qu’encargase del mesmu la secretaria municipal, que precisamente s’incorporaba güei al puestu depués d’un periodu de baxa.

PP y PSOE solicitaron la ellaboración d’otru, a los que se sumó Izquierda Xunida (IX) –ún de los grupos que presentaron la ordenanza nel Rexistru– pa garantizar la so llegalidá. Independientes por Noreña (IPÑ), partíu que tien l’alcaldía, accedió al pidimientu, polo que la so aprobación definitiva va retrasase al menos al Plenu ordinariu de febreru o a dalgún estraordinariu que se pudiera convocar por cuenta los presupuestos municipales del 2019.

Conceyu Abiertu por Noreña, formación qu’impulsó la ellaboración de la ‘Ordenanza Municipal pal Usu de la Llingua Asturiana nel Conceyu de Noreña’, refugaba esta situación al entender que l’informe xurídicu sobre’l conteníu nun ye necesariu yá que’l testu cumple col informe de procedimientu fechu pola secretaría y cuenta col informe d’intervención económicu que demanda la llei. Sicasí, la cuestión va tornar a tratase nuna próxima Comisión del Cultura una vegada la secretaria municipal fine’l testu demandáu.