El Plenu de Grau nel que s’aprobaron les ordenances d’asturianu va tener que repetise

El miércoles que vien va repetise de manera íntegra’l Plenu celebráu’l martes nel que s’aprobaron les ordenances d’asturianu de Grau, ente otros asuntos. Foro y los conceyales non adscritos amenazaron con impugnalu por un defeutu de forma, polo que l’equipu de gobiernu opta por tornar a convocalu.

Nun hebo nin llugar pal alderique. Plácido Rodríguez Fernández, conceyal de Cultura, Desarrollu Llocal y Comunicación, encargóse de defender les ordenances, pero tanto la conceyala de Foro como los dos non ascritos presentes non tomaron la pallabra, al igual que fixeron nel restu de los puntos del orde del día.

La razón yera que l’avisu de la Policía llocal que tresllada l’orde del día a los grupos municipales nun taba fotocopiáu per una cara, polo qu’amenazaron con impugnar el Plenu por considerar que la convocatoria yera irregular. Pese a ello, l’alcalde José Luis Trabanco decidió continuar col mesmu, anque finalmente va repetise’l miércoles próximu a les 18 hores pa salvar los problemes que pudiera conllevar dicha impugnación.

Les ordenances d’asturianu aprobáronse colos votos favoratibles de los 9 conceyales d’Izquierda Xunida (IX) y los 3 del PSOE, posicionándose en contra la de Foro y 2 de los 4 non adscritos presentes, que decidieron refugar tolos puntos del orde del día. Ente ellos taba’l preste a los presupuestos municipales del 2019, que salieron alantre cola astención socialista.

El miércoles van quedar aprobaos de manera definitiva, al igual que les ordenances. Falta ver qué posición tomará Foro y los cuatro conceyales non adscritos, ex del Partido Popular (PP), con respeuto al documentu que va regular l’emplegu de asturianu nel conceyu, anque previsiblemente los cincos ediles optarán pola astención.