El plazu pa participar nel mecenalgu popular de 'Llugares máxicos d'Asturies' fina en 8 díes

De gran formatu, el llibru presenta 60 allugamientos especiales del país venceyaos a lleendes o histories esmenuzaes en testos billingües qu'acompañen a les semeyes.

“Son 60 llugares d’Asturies señalaos, onde atopar dalgo especial, dalgo máxico, anque non nel sentíu esotéricu. Son llugares físicos qu’heredamos d’otres etapes, como la megalítica, o de la naturaleza”, esplicaba Bertu Ordiales a Asturies.com nel momentu d'abrir la cuestación popular na rede de ‘Llugares máxicos d’Asturies’, entamada al traviés de la plataforma Verkami. El llunes viniente, de nueche, va zarrase la campaña cola que l'autor pretente facer realidá esti proyeutu yá termináu, a falta namái de pequeños detalles.

Pa ello necesita 4.500 euros, cantidá mínima necesaria p'afrontar los costos d'edición d'esti llibru de gran formatu que se vende a 30 euros, 35 con unvíu a domicilio, cola posibilidá d'acceder a delles promociones de mecenalgu qu'inclúin taces o alfombres pal ordenador. Nel momentu de redautar esta noticia, 'Llugares máxicos d'Asturies' llevaba recaudaos 3.920 euros.