“El llibru pretende que la xente conoza estos llugares pa preservalos pal futuru”, destaca Bertu Ordiales

|
Cubierta ‘Llugares máxicos d’Asturies’ de Bertu Ordiales

‘Llugares máxicos d’Asturies’ ye’l trabayu últimu de Bertu Ordiales, que dende esti xueves tien en marcha una campaña de cuestación popular na rede pa financiar el so asoleyamientu pa primeros d’añu. Trátase d’un llibru billingüe col que pretende que la xente conoza 60 allugamientos del país que puedan preservase “pal futuru”.

Con una edición en formatu grande, incorpora semeyes de gran guapura de dichos paisaxes acompañaes d’un testu n’asturianu y otru en castellanu con fondu prietu y lletra blanca que cuenten una historia o lleenda sobre’l sitiu, en munches ocasiones venceyada a la mitoloxía de los astures. “Son 60 llugares d’Asturies señalaos, onde atopar dalgo especial, dalgo máxico, anque non nel sentíu esotéricu. Son llugares físicos qu’heredamos d’otres etapes, como la megalítica, o de la naturaleza”, esplica.

Asina atópense nes fueyes dólmenes solitarios, castros esceaecíos o sitios pincelaos pola ñatura, que s’axunten a espacios habitaos por xanes, cuélebres o pataricos. Una bayura de llugares máxicos del país que l’autor estructura en siete capítulos.

“El llector primero va tener un contautu visual del llugar, pa depués acudir al testu y tornar otra vuelta a la imaxe con otra mirada”, espresa’l biólogu, que considera que’l so trabayu “ye importante pa la cultura asturiana y como espresión turística”. Pero sobre manera, cree esencial “que la xente conoza estos llugares pa preservalos pal futuru”, apunta al tiempu que recuerda situaciones como la que vivió la Llastra la Filadoira, n’Eilao, dolmen “al que pintaron na piedra ‘coto privado de caza’”.

Ufierta nes primeres 72 hores

Esta mañana dio comienzu en Verkami la campaña de cuestación popular de ‘Llugares máxicos d’Asturies’, cola qu’Ordiales pretende recaudar en 40 díes 4.800 euros los costos d’edición del libro. El so preciu ye de 30 euros, pero nos trés primeros díes ye posible facese con él por 28 euros.

La xente interesao dispón de delles opciones, con recompenses que van dende agradecimientos nel llibru a regalos como una alfombra pal ratón del ordenador o una taza esclusiva personalizada.

Contador Estadistiques