El númberu de visitantes estranxeros sigue n'aumentu

Los dos primeres meses del añu rexistraron una medra del 17,9 por cientu de visitantes estranxeros. Los datos espublizaos esti miércoles pol Instituto Nacional de Estadística (INE) reflexa tamién un bon crecimientu nel turismu rural en febreru, anque reflexa una cayida del 1,8 si tenemos en cuenta tolos tipos d’agospios.

El direutor xeneral de Turismu, Julio González Zapico, destacó, tres conocer estes cifres, la evolución del turismu estranxeru. Asina fixo referencia al “caltenimientu del crecimientu sosteníu del turismu internacional mientres los dos primeros meses del añu, con incrementos del 17,9 por cientu en turistes y del 15,3 por cientu n’agospios” en comparanza colos d'esi mesmu periodu nel 2017.

Al so xuiciu, esta medría ta rellaicionada de manera direuta con “les posibilidaes de conexón aérea direuta coles que cuenta’l Principáu, asina como col importante esfuerciu promocional que tamos faciendo nos nuestros mercaos internacionales principales, d’alcuerdo colo que marca’l Programa de Turismu Sostenible del Principáu d'Asturies 2020”. Tamién quixo destacar l’aumentu nel turismu rural, “ún de les nueses señes d’identidá, la marca de la nuesa política turística”, con un crecimientu del 11,5 por cientu de turistes, que contabilizaron un 13,8 por cientu más d’agospios, cifra qu’aumenta hasta’l 31 y el 18,5 por cientu, de manera respeutiva, si tenemos en cuenta los dos primeros meses del añu.

En total, incluyíos tolos tipos d'establecimientos, Asturies recibió en febreru 84.205 visitantes que fixeron nueche 152.163 díes, cifres que representen descensos del 1,8  por cientu y del 0,6 por cientu, de manera respeutiva.