El númberu de turistes baxó nun 7 por cientu nel primer cuatrimestre

Asturies recibió 448.212 turistes nel primer cuatrimestre, con un aumentu del númberu de viaxeros internacionales. Esta cifra supón un descensu del 7 por cientu en comparanza col mesmu periodu del añu pasáu, cuando se rexistró’l récor de 482.812 visitantes.

Si miramos les cifres d’estancies, pasó de 943.521 a 869.503, lo que supón un descensu del 8,2 por cientu. Sicasí, dambos datos son los dos meyores rexistraos pol Instituto Nacional de Estadística (INE) pal país nesi mesmu periodu.

El turismu rural y l'internacional, mentes, caltuvieron el so enclín a l'alza, con un aumentu del 4,9 por cientu en visitantes nel primeru de los casos y del 4,5 por cientu nel segundu en comparanza col mesmu periodu del 2017. En total, 51.732 viaxeros estranxeros visitaron Asturies nel primer cuatrimestre.

Al respeutive de los datos d'abril, toles tipoloxíes d'agospiamientu perdieron turistes y nueches y atoparon descensos del 26,7 por cientu y del 34 por cientu, de manera respeutiva, en comparanza col mesmu mes del añu pasáu. Nesti sen, hai que destacar que nel 2017 la Selmana Santa celebróse n'abril, lo qu'esplica l'eleváu volume de visitantes y estancies.