El Muséu del Pueblu d'Asturies acueye la mayor espicha del país

|
Cartelu IX Primer Sidre l'Añu

La IX Primer Sidre l'Añu allárgase per cuatro díes en Xixón, del xueves al domingu.

Más de 70 llagares van participar na gran folixa sidrera de la Selmana Santa, entamada cola intención de recuperar la tradición de les espiches nestes xornaes festives y el consumu de sidre nuevo, ensin trasegar. La revista 'La Sidra' y la Fundación Asturies XXI son los organizadores d'esta festividá declarada de raigón pol Conceyu de Xixón qu'axunta dende hai nueve años a cientos de persones mientres cuatro xornaes nel tendayu del Muséu del Pueblu d'Asturies.

Mañana, a les 13 hores, va tener llugar la inauguración de la Primer Sidre l'Añu, na que va tar presente'l conceyal deTurismu, Deportes, Festexos y Mocedá, Jesús Martínez Salvador; representantes de la Fundación Asturies XXI; y el popular echador y hosteleru Tino ‘El Roxu’, que va escanciar el ‘culín inaugural’. Nun podría faltar a la cita Raúl Riestra, de Sidra Riestra, llagar ganador del concursu previu 'La Meyor Primer Sidre l'Añu' y, poro, sidra oficial del eventu, que va tar acompañáu por Emilio Rubio, de la sidrería La Montera Picona, onde'l xuráu pudo valorar la calidá de les 45 sidres participantes.

El preciu p'acceder al recintu pasa de 5 a 6 euros y permite prebar la producción de los más de 70 llagares participantes. Amás, entámense una gran cantidá d'actividaes como la IX Asturianada y Sidre (vienres y sábadu a partir de les 16 hores), el VII Concursu de Sidra Fecho en Maera (domingu, 13 hores), tasties o xuegos pa la reciella, ente otros. L'horariu d'apertura va ser de 13 a 22 hores, mañana; de 12 a 22 hores, el vienres y el sábadu; y de 12 a 17 hores, el domingu.

Contador Estadistiques