9.500 persones acudieron a la IX Primer Sidre l'Añu

El mierense Luis Álvarez, ganador na edición del 2016 y terceru na del 2017, llevó'l VII Concursu de Sidre Casero Fecho en Maera.

Pese a que'l tiempu nun acompañó, con muncha agua cayida de manera intermitente esta Selmana Santa, alredor de 9.500 persones, según los datos daos pola organización, pasaron ente'l xueves y el domingu pel Muséu del Pueblu d'Asturies pa disfrutar de la IX Primer Sidre l'Añu. Esti eventu sidreru, entamáu pola revista 'La Sidra' y la Fundación Asturies XXI, permitió prebar la sidre nuevo, esto ye, ensin trasegar, de más de 70 llagares, amás de disfrutar de delles actividaes, como tasties, xuegos tradicionales o música, destacando'l festival Asturianada y Sidre.

Ayeri, na xornada cabera d'esta edición, celebróse'l VII Concursu de Sidre Casero Fecho en Maera, na que participaron venti persones. El ganador foi Álvarez, que tuvo como recompensa una pipa de 150 llitros.

En segundu llugar quedó Josemer Oviñana (Uviéu), siguíu por Ángel Marcos (Pumarín, Xixón), finando en cuartu y quintu llugar el llavianés residente en Pinzales (Xixón) José Luis Fernández y Ricardo García (Deva, Xixón), de manera respeutiva. El xuráu tuvo compuestu polos catadores Xuaquín Fernández y Rosa María Valdés; Pedro Baldón llagareru de Sidra El Duque; Juan Carlos Valdés, de Sidra L’Allume; y Manuel Gutiérrez Busto, collaborador de 'La Sidra', que fixo de presidente, ocupándose del escanciáu Jorge Neagu, de la sidrería La Montera Picona, ganador de la prueba xixonesa del Campeonatu Oficial d'Escanciadores d'Asturies del 2017.

Esti concursu ta orientáu a llagareros non profesionales de tol país qu'empleguen el sistema tradicional d'elaboración de sidra en pipa de maera y nació col oxetivu de dar puxu al usu d'esti material pa la so producción, que ta perdiéndose pola xeneralización de los depósitos de fibra de vidru y d'aceru inoxidable. Amás d'una pipa pal ganador, esta competición tien como recompensa pal segundu clasificáu un xuegu de densímetros y termómetru, y 500 corchos de primera calidá, pal terceru.