El llitru de gasolina, penriba l’euru col petroleu en máximos históricos

L'entamu d'una crisis enerxética nun ye la meyor anuncia pa los mercaos internacionales. Anque los espertos aseguren que nun hai falta de petroleu y acusen a los especuladores, el casu ye que'l preciu de barril de petroleu algamó los 41,38 dólares, datu que ta tirando pela la inflación na mayoría de les economíes, como espeyen los precios de les gasolines.

Con esti panorama, les bolses tuvieron una selmana mala, y mentanto que Wall Street peslló a la baxa, les bolses europees tuvieron una selmana mui negativa, sobremanera l'Ibex-35, que ta cerca del mínimu añal.

Wall Street trancó a la baxa'l vienres, y l'índiz Dow Jones llegó a los 10.013 puntos, lo que supón una perda menor del 0,4%. Al tecnolóxicu Nasdaq nun se-y dio meyor, baxando a los 1.096 puntos con una perda del 1,13%. Al otru llau del Atlánticu los mercaos bursátiles tuvieron una selmana feble. Francfort cayó penriba'l 0,5% mentanto que Paris y Llondres tuvieron perdes penriba'l 0,3%.

N'España, cayida llibre del Ibex-35 dempués d'un entamu d'añu prometedor. Les ganancies del añu ya desapaecieron de la mayoría de los valores énte'l mieu de los inversores a una crisis enerxética. La Bolsa de Madrid amestó la quinta selmana consecutiva en perdes col índiz Ibex nos 7.779,70 puntos (-3,1% selmanal) y una cayida xeneralizada de los blue chips colos valores del Grupu Telefónica en barrena y Sogecable, Jazztel, SCH, BBVA y Amadeus perdiendo a esgaya.

Otramiente, la xuba de tipos d'interés nos Estaos Xuníos va perxudicar a Llatinoamérica, onde tienen perimportantes inversiones les grandes empreses españoles. Ente los valores ganadores de la selmana, Iberdrola, ACS, FCC, Banco Popular, Enagás y Red Eléctrica, pero con xubes mui perbaxo'l 1%.

L'esaxeráu preciu que ta algamando'l barril de petroleu ta esfarraplando les bolses y dañando enforma la economía mundial.

El riesgu d'una crisis enerxética ye bien claro como apunta la estimación de que'l preciu del petroleu pue algamar los 50 dólares. En Llondres el barril Brent llegó a pagase a 38,7 dólares, máximu dende 1990, y nos mercaos norteamericanos el crudu algamó los 41,5 dólares. Los analistes apunten tamién a la inestabilidá de los grandes productores como Venezuela y Nixeria, la xuba del consumu mundial gracies a la fuerte industrialización china y sobremanera a la presión de los países de la OPEP.

L'euru tuvo una selmana de blincos énte'l dólar. Al final de la selmana la divisa europea caltuvo la cota de los 1,186 (+0,3%). Nel mercáu de renta fixo la rentabilidá de los bonos sigue cayendo. El bonu de referencia'l bund alemán tien una rentabilidá del 4,303%.