'El lliriu blancu', l'aventura nueva d'Ásterix, yá tien portada

El númberu 40 va salir a nivel mundial el 26 d'ochobre con versión n'asturianu.

'El lliriu blancu' ye'l nome de l'aventura nueva d'Astérix, que llega cola novedá del cambiu de guionista. Jean-Yves Ferri, embarcáu n'otru proyeutu, dexa pasu Fabrice Caro, conocíu por Fabcaro, que ye'l nome qu'apaez na portada que ta acabante de ser desvelada.

Les llibreríes asturianes van disponer d'esta historia en llingua asturiana'l 26 d'ochobre, fecha na que se va llanzar en tol mundu en numberoses llingües. Nel Estáu, Salvat-Bruño edítala tamién en castellanu, catalán, eusquera y gallegu.

El responsable de la versión asturiana va siguir siendo Xesús González Rato, que nos años últimos sustituyó a María Xosé Rodríguez López. Ésta va ser la decimoséptima aventura del galu disponible n’asturianu.