El IX Día de la Reciella llega’l sábadu 1 d’ochobre con un desfile de moda y música xamaicana ente les novedaes principales

|
VIII Día de la Reciella tendayu

La xornada más esperada del añu pa los más mozos yá ta equí. El sábadu viniente'l Muséu del Pueblu d’Asturies va acoyer el IX Día de la Reciella con actividaes d’años anteriores que repiten y novedaes, como un desfile de moda y una pinchada didáutica de música xamaicana, a los qu'hai que sumar un conciertu d’Alfredo González.

Va ser, como siempre, un día enllenu d’actividaes variaes pa tola familia, toes n’asturianu, nun entornu privilexáu col tendayu como centru principal d’operaciones. Una xornada pa vivir y disfrutar en llingua asturiana dafechu entama ‘Reciella. Families pol Asturianu’ y na que collaboren dellos coleutivos y clubes, asina como la Oficina de Normalización Llingüística de Xixón.

Repiten l’axedrez, el valtu o'l cosplay depués de lo muncho que prestó l’añu pasáu, amás d’otres habituales. Mentes, incorpórense novedaes como una pinchada didáutica al rodiu de la música xamaicana polos responsables del programa ‘Ximiélgalo Radio Show’ de Radio Kras o un desfile de moda entituláu ‘La tradición ye la inspiración’ a cargu de Ringo Rango que va tresmitir en direuto Nordés Móvil.

Esta selmana va presentase nun actu col Conceyu de Xixón la programación completa, que va arrancar a les 11 hores y va pesllar a les 19 hores cola danza prima depués del conciertu d’Alfredo González, intérprete del cantar d’esti Día de la Reciella, entituláu ‘L’asturianu conéctate’.

Contador Estadistiques