El II Semando, festival “p’amosar xente mozo pa que’l públicu mozu s’anime a montar un grupu”, camina al enllenu

‘Festival de música moza n’asturianu’ ye como se presenta’l Semando Fest, certame que va tener llugar el vienres 9 de febreru na uvieína Lata de Zinc. Al igual que na primer edición, esta segunda va camín del enllenu con trés cuartos d'aforu yá vendíu con un cartelu con amplia presencia femenina que presenta propuestes musicales estremaes como asturianada, rap, folk celta y punk.

“El Semando ye imaxe de que la música asturiana xorrez”, apunta Xicu Ariza, de Musicasturiana.com y Ixuxú Cultura, entamadores del certame. “Fai ver esi revelu xeneracional, menor al qu’hai n’otros territorios con llingua propia, pero qu’esiste”, sigue.

Y eso magar “la falta de presencia nos medios públicos o nos programes festivos de los ayuntamientos”, cuestiones que torguen “la profesionalización” de los grupos y l’efeutu imitación al nun sentir o ver música asturiana. D’ehí la creación del Semando Fest, que busca “amosar xente mozo pa que’l públicu mozu s’anime a montar un grupu ellos mesmos”.

Si l’añu pasáu’l cartelu presentó asturianada, folk, la fusión de música tradicional con xéneros más modernos y música electrónica, nesta ocasión los asistentes van poder disfrutar de nueves propuestes de los dos primeros estilos amás de rap y punk. Músicos toos ellos menores de 34 años, sacante dalguna esceición, y siete muyeres, cumpliéndose asina otra de les motivaciones del festival: avanzar hacia la igualdá na música asturiana.

La cantadora Sandra Álvarez y la escritora Noemí González van ufrir un espectáculu qu’amiesta asturianada y poesía feminista, mentes que’l rap va llegar de la mano de Mostru l’Horru, con lletres reivindicatives y bases influyíes pol reggae o’l rock. Guieldu, una de les bandes moces que tán ganando un nome dientro de la escena atlántica, y que precisamente dio güei a conocer un tema nuevu en YouTube, 'Flor d'Artu', va presentar folk celta y new age, pa completar el II Semando Fest una formación punk yá veterana magar la so mocedá, Ochobre.

Promoción col CD ‘Semando Son’

Les entraes tán a la venta na rede al traviés d’esti enllaz a un preciu de 12 euros, de 10 pa menores de 26 años. Esiste la posibilidá de facese con una promoción por 20 euros qu’inclúi’l CD ‘Semando Son’, compilatoriu con 12 temes inéditos de los 4 grupos o artistes que participaron na primer edición del Semando Fest.

El festival cuenta con un formatu orixinal qu’entemez aspeutos d’una gala colos d’un conciertu y reivindica les sales de conciertos como un espaciu afayadizu pal espoxigue de la música de raigañu.