El discu ‘Semando son’ presenta 12 temes inéditos n'asturianu qu’amuesen “una renovación xeneracional y musical”

D’una interpretación canónica d’una asturianada grabada por La Busdonga va más de 100 años a electrónica de raigañu con música orixinal de Mapi Quintana. Ye’l percorríu que fai ‘Semando son’, “un viaxe al traviés de la música asturiana”, que diría’l so impulsor Xicu Ariza na presentación nel II Reguerada Fest d’esti compilatoriu con 12 temes inéditos de 4 artistes o grupos con miembros de menos de 35 años.

“Axuntamos a toa una xeneración de xente mozo que ta puxando pola música asturiana dende distintos ámbitos o distintes formes d’entender la música asturiana. Vese qu’hai una renovación y esta renovación ye tanto xeneracional como musical”, apuntó Ariza a Asturies.com, qu’añadió que “si lo comparamos cómo yera la música asturiana va 10, 15 o 25 años, vemos qu’agora hai más diversidá. Enantes yera sobremanera folk o celta, o rock o punk-rock, y agora vense más matices de colores”.

D’esta forma atopamos “xente mozo faciendo música n’asturianu tanto en tonada, como n’electrónica, como en rock, como en folk, como fusionando la música tradicional, como pue ser Algaire”. Ye la banda de Mieres precisamente una de les cuatro que conformen ‘Semando son’ aportando trés cantares ‘Ensin nome’, la versión de Desakato ‘El mio camín’ y la conocida ‘Coral y maera’ na manera como s’interpretó nel últimu Premiu Camaretá al Meyor Cantar, que precisamente ganó.

Enantes pue atopase nel discu los cantares ‘A pasar por el puerto’, ‘Carretera d’Asturies’ y ‘Para castañes, Tremañes’, d’Alicia Villanueva y Luis Álvarez Pola, y ‘Trípticu I. Carru’l país’, ‘Multihalling’ y ‘Trípticu II. Aguadores’ de la formación de folk de cámara Loína. Pieslla’l compilatoriu ‘En to ventana’, ‘La molinera’ y ‘Olga’, pieces d’electrónica de Llevólu’l Sumiciu.

Diferencies con otres escenes de la redolada

Ariza nun quixo dexar pa prau “la parte mala, que tamién la hai”. “Tamos mui lloñe d’otres escenes musicales de la nuesa redolada. Compárase lo qu’hai n’Asturies y lo qu’hai en Galicia o Euskadi y nun hai color; tamos munchísimo peor qu’ellos”, dalgo que considera “normal por delles causes: la crisis demográfica, el retrasu de 40 años de polítiques culturales y la falta d’oficialidá del asturianu que lleva a la sociedá a nun tar alfabetizada, amás del fechu de nun conocer la música n’asturianu, y al nun conocela nun hai una demanda d’ella como tampoco nun hai una programación d’ella como sí se ta dando n’otros territorios. Una programación lo qu’al final fai ye que’l públicu conoza la música n’asturianu y la demande”.

Nesi sen, llamentó na presentación del sábadu, na que tuvo acompañáu por representantes de les cuatro propuestes qu’apaecen nel ‘Semando son’, que “si al final namás se programen orquestes y suena música mainstrean, pues va ser lo que la xente demanda mayoritariamente”. Darréu apuntó que, poles estadístiques “que’l públicu que consume música n’asturianu en plataformes dixitales anda nuna franxa d’edá ente 35 y 55 años, y per baxo d’eses edaes el consumu ye bastante probe; a diferencia de lo que pasa notros sitios”.

Sicasí, tamién rescampló como aspeutos positivos que “nestos últimos meses tamos viendo como ta habiendo una montonera d’eventos onde la música n’asturianu ye protagonista, y estos eventos tán furrulando bien, pesie a coincidir nel tiempu, polo que quier dicir que públicu hai”, y que “ta habiendo muncha xente que se ta apuntando a deprender a tocar la pandereta, a grupos de baille”, lo que-y permite tener esperanza en “que de toa esta xente que se ta formando surdan nuevos grupos y nueves propuestes musicales”.

Nun s’escaeció de la figura “mediática y de tanta calidá en tolos sentíos” de Rodrigo Cuevas, “qu’ayuda a valtar con esos males d’autodiu y cosmopaletismu que sufrimos per tanto tiempu la xente asturiano. Y ta faciendo muncho por da-y valir a la nuestra identidá. Tola xente que tamos nesto, tenemos qu’aprovechar esta fola pa que convertila nun tsunami”.

El II Semando Fest, en febreru

La cita finó con un alderique sobre’l relevu xeneracional na música asturiana ente tolos componentes de los grupos presentes, que falaron sobre los cantares que grabaron y firmaron CDs al públicu asistente al II Reguerada Fest, certame que’l sábadu peslló con una actuación d’Algaire. El compilatoriu ‘Semando son’, que nació a partir de la iniciativa Semando Fest entamada por Musicasturiana.com n’Uviéu esti febreru, grabóse en xunetu nos Tutu Estudios de Corvera baxo la producción Sergio Rodríguez y contó col diseñu y maquetación de la ilustradora xixonesa Cecilia Diaz y la producción executiva ye d’Ariza.

Musicasturiana.com y Ixuxú Cultura van siguir apostando por esta fórmula y yá tienen fecha acutada pal II Semando Fest, nel que van participar otres cuatro propuestes musicales moces que se van anunciar según s’avere la cita. Va celebrase’l 10 de febreru tamién na Lata de Zinc y los promotores cuenten con volver a escosar toles entraes.

Na imaxe superior, Ariza, primeru pela derecha, intervién na presentación del discu nel II Reguerada Fest. Semeya obra de Raúl Alonso.