El Gobiernu retrasa una selmana la posible apertura del pequeñu comerciu

“Salú Pública cree conveniente esperar al llunes de la selmana siguiente, daos los datos de la fin de selmana, pa ver la evolución epidemiolóxica enantes de poner restricciones menores al pequeñu comerciu”, afirmó Adrián Barbón nun parón de la xunta del Comité de Crisis COVID. La ocupación de la UCI ta al 75 por cientu.

"Cuando haya una evolución positiva de la pandemia, va ser la primer actividá económica en reabrir", avanzó tamién el presidente del país, qu'aseguró que "tamos nuna situación crítica" no que respeuta a l'atención hospitalaria, anque entovía "asumible" según apuntó Concepción Saavedra, direutora xerente del Serviciu de Salú del Principáu d'Asturies (SESPA). "Esta selmana ye clave pa ver si s'aprecia un cambiu de tendencia" tres les midíes puestes nes selmanes últimes, añadió'l llavianés.

Na so intervención tamién anunció que se va prorrogar el zarru perimetral de Xixón, Uviéu y Avilés al entender Salú Pública que sirvió pa controlar l'espardimientu del coronavirus SARS-CoV-2, y nun descartó qu'esta mesma selmana se decrete n'otros puntos del país. Tamién anunció cribaos y llamó a la "responsabilidá individual" de toles asturianes y asturianos.

22 cames UCI más

Saavedra dio delles cifres sobre la situación actual nos hospitales. Apuntó qu'hai un 75 por cientu d'ocupación de cames UCI, cuando hai una selmana yera del 56 por cientu, y anunció l'ampliación de les 240 actuales en 22, 15 nel HUCA y 7 en San Agustín, cola previsión de disponer d'otres 20 más próximamente.

Na semeya, Barbón y Saavedra.