El Comité de Crisis de la COVID-19 aconceya cola apertura del pequeñu comerciu sobre la mesa

Podría retomar l'actividá dende'l miércoles.

A les 17.30 hores d'esta tarde ta convocáu un aconceyamientu nuevu del Comité de Crisis de la COVID-19 n'Asturies, que va ser telemáticu, al igual que'l del llunes pasáu. Va presidilu Adrián Barbón, que va tar acompañáu pol vicepresidente y conseyeru d'Alministración Autonómica, Mediu Ambiente y Cambiu Climáticu, Juan Cofiño; el conseyeru de Salú, Pablo Ignacio Fernández Muñiz; la conseyera de Presidencia, Rita Camblor; la conseyera d'Educación, Carmen Suárez Suárez; la conseyera de Derechos Sociales y Bienestar, Melania Álvarez; la conseyera de Cultura, Política Llingüística y Turismu, Berta Piñán; la xerente del Serviciu de Salú del Principáu d'Asturies (SESPA), Concepción Saavedra; y el direutor xeneral de Salú Pública, Rafael Cofiño, cola participación de la Delegación del Gobiernu estatal n'Asturies, la Federación Asturiana de Conceyos y los alcaldes de los conceyos en zarru perimetral.

Sobre la mesa va tar la posible apertura del pequeñu comerciu, figura que yá se plantegaba na prórroga de les restricciones a la hostelería y al restu d'actividaes comerciales consideraes non esenciales aprobada'l miércoles, que les allarga hasta'l 3 d'avientu. La baxada de los datos de contaxos del coronavirus SARS-CoV-2 na selmana última podría facilitar dar esti pasu qu'ayudaría a respirar a esti sector.

Barbón anunció una intervención pública a les 18.30 hores, na que se comunicaría esta midida qu'entraría a valir previsiblemente'l miércoles.

Na imaxe, Barbón na xunta telemática del Comité de Crisis COVID-19 del llunes pasáu. Semeya obra d'Armando Álvarez.