El Gobiernu modifica la so estructura pa reformar l’Alministración y ameyorar la comunicación cola zona rural

La crisis sanitaria pola pandemia de COVID-19 cambia les prioridaes del Gobiernu pa esta llexislatura. Adrián Barbón, a falta d’un mes pa cumplir un añu como presidente, anunció una restructuración del so equipu p’afrontar dos retos: una reforma de l’Alministración y un ameyoramientu de les comunicaciones internes del país.

“Esti tiempu cambiónos”, apuntó’l socialista, “a min como persona y como presidente. D’esta crisis sal un presidente diferente al qu’entró”. “Los cambios sirviéronnos pa ver qu’hai oxetivos que se punxeron enriba de la mesa que nos esixen modificar la nuesa respuesta”, añadió, poniendo como exemplu la necesidá “d’actualizar la nuesa Alministración; qu’hai que reformala; qu’hai que reformulala. L’Alministración asturiana necesita una modernización, una puesta a puntu, pa facela sostenible” y, asina, “adaptala al sieglu XXI” y “ponela en valor”.

Por esti motivu, Barbón va reforzar el papel de Juan Cofiño nel Executivu, hasta agora vicepresidente y conseyeru d’Infraestructures, Mediu Ambiente y Cambiu Climáticu. Va abandonar Infraestructures cola fin de que se centre nesta reforma de l’Alministración, pasando a nomase’l so departamentu Conseyería d’Alministración Autonómica, Mediu Ambiente y Cambio Climáticu.

L’otru retu que nun taba marcáu como oxetivu prioritariu al principiu de la llexislatura ye la vertebración del territoriu. “El mediu rural sal revolorizáu d’esta crisis”, aseguró Barbón, que considera que “necesita polítiques claves d’ameyoramientu de comunicaciones, d’ameyoramientu d’infraestructures, y tamién evidentemente de conexón col centru d’Asturies al traviés d’un lóxica y progresiva rede de tresportes”.

Asina, Alejandro Calvo garra l’área d’Infraestructures ensin dexar el so departamentu actual. D’esta forma, la conseyería incorpora a Mediu Rural l’apellíu de Cohesión Territorial.

Esta reestructuración de les funciones d’estos dos conseyeros, mentes, faen adelgazar la conseyería de Rita Camblor, responsable de Presidencia, que pierde Función Pública. Sicasí, caltién Xusticia, Emigración, Axenda 2030, Mocedá y Cooperación.

Na imaxe, Gobiernu d'Asturies con Barbón nel centru y Cofiño a la so derecha, Camblor a la so izquierda, y Calvo detrás. Semeya obra d'Armando Álvarez.