El Gobiernu entama la so reestructuración y fai públicos diez nomamientos

La reestructuración del Gobiernu p’afrontar la reformar de l’Alministración y ameyorar les comunicaciones internes del país pa sofitar el desarrollu rural, yá ta en marcha. El Conseyu de Gobiernu aprobó’l xueves los decretos d’estructura y el vienres nomó a los responsables de les diez direiciones xenerales afeutaes.

El 20 de xunu, día últimu del Estáu d’Alarma, el presidente Adrián Barbón daba anuncia de les sos intenciones tres detectar dellos problemes mientres esi periodu de la pandemia que lu llevaba a cambiar les prioridaes pa la llexislatura. Asina anunciaba que Juan Cofiño diba liderar la reforma de l’Alministración al frente de la nueva Conseyería d’Alministración Autonómica, Mediu Ambiente y Cambio Climáticu y Alejandro Calvo l’impulsu de l’Asturies Rural garrando l’área d’Infraestructures na Conseyería de Mediu Rural y Cohesión Territorial.

Ayeri nel Conseyu de Gobiernu dábase un pasu más cola aprobación de los respeutivos decretos d’estructura, que nun lleven a un aumentu del númberu total de cargos altos. Ún de los principales cambios ye la creación de la Viceconseyería d’Infraestructures, Movilidá y Territoriu, que va tener al frente a Jorge García, hasta agora direutor xeneral de Movilidá y Coneutividá, y ún de los diez nomamientos fechos güei nun aconceyamientu nuevu del Conseyu de Gobiernu.

L’economista Miguel Ángel Rodríguez Fernández va garrar les riendes de la Direición Xeneral de Función Pública en sustitución de Margarita Isabel Fernández Vega, área que pasa a depender de la conseyería de Cofiño. Mentes, José Manuel López Guerrero, funcionariu del cuerpu de Profesores Téunicos de Formación Profesional, va xestionar la Direición Xeneral de Personal Docente en sustitución de Miguel Ángel Barón, que dexa’l cargu por pidimientu propiu.

Los otros nomamientos son de persones yá dientro del organigrama, como Javier Fernández Rodríguez como direutor xeneral de Seguridá y Estratexa Dixital y de Clara Sierra de Mocedá, Diversidá Sexual y Derechos LGTBI, dambos na Conseyería de Presidencia. En Mediu Rural y Cohesión Territoria, Saturnino Rodríguez toma Ganadería y Sanidá Animal; María Begoña López Fernández, de Desarrollu Rural Agroalimentación; Fernando Prendes, d’Infraestructures Rurales y Montes; David Villar, de Mediu Natural y Planificación Rural; María Esther Díaz López, d’Infraestructures Viaries y Portuaries; y José Manuel Caldevilla, de Tresportes y Movilidá.

Na imaxe, un momentu del aconceyamientu telemáticu del Conseyu de Gobiernu de güei tomada dende Presidencia. Semeya obra d'Armando Álvarez.