El Gobiernu llama a respetar la llende de 90 quilómetros per hora n'autovíes pola contaminación

|
Contaminación en La Calzada martes 26 de febreru del 2019

L’incumplimientu de la llende de los 90 quilómetros per hora n'autovíes que marca’l nivel 1 del protocolu de contaminación nel área central ta siendo importante por parte de los conductores, que serán sancionaos por Tráficu al ser deteutaos nos radares. L’avisu n’Uviéu, Xixón y Avilés va siguir al menos un día más.

Elena Marañón, direutora general de Prevención y Control Ambiental, amosó esta mañana la so tristura pola falta de responsabilidá de los ciudadanos no que respeuta al cumplimientu de la llende de 90 quilómetros per hora nes autovíes. Son numberosos los casos deteutaos polos radares de Tráficu, que multarán a toles persones que superaron esa velocidá estos díes.

Por ello pidió a la ciudadanía mayor compromisu con aquelles midíes que precisen de  la so colaboración, como la respeutiva al tráficu o la utilización del tresporte públicu como alterniva. Aconseya, amás, que les personas con problemes respiratorios eviten l’actividá física al aire llibre nes zones más espuestes a les partícules.

N’Avilés nun hai meyoría

Los datos que manexa’l Gobiernu dan una meyoría de la presencia de partícules de diámetru inferior a 10 micras (PM 10) como les de diámetro inferior a 2,5 micras (PM 2,5) en dalgunes zones d’Uviéu y Xixón, con valores mínimos más propios del nivel 0, o preventivu, del protocolu, mientres que la situación n’Avilés ye similar a la de xornaes precedentes. Otra manera, nes cuenques los indicadores son normales, inferiores a los que se consideren para l’activación del protocolu.

A pesar de que nun s’esperan lluvies, las previsiones apunten a que les inversiones térmiques perderán intensidá y les condiciones de ventilación ameyorarán nos díes próximos, nos que se valorará si’l protocolu cambia de nivel –pue tar en 0, 1 o 2, con diferente tipu d’actuaciones– o se desactiva. Mentanto, caltiénense pa Uviéu, Xixón y Avilés les restricciones correspondientes al nivel 1.

Na semeya, aspeutu del cielu ayeri nel barriu xixonés de La Calzada.

Contador Estadistiques