“El festival de Villaviciosa ufre al públicu un pack completu de lo que ye la gaita”, rellata Muñiz

“Dende la tonada al folk y les bandes de gaites… El festival de Villaviciosa ufre al públicu un pack completu de lo que ye la gaita”, apunta David Muñiz, secretariu de la organizadora Banda de Gaites Villaviciosa-El Gaitero. Dende esti xueves y hasta’l domingu la villa va vivir un gran ambiente al rodiu esti instrumentu tradicional.

Cerca de 300 músicos procedentes d’Asturies, Galicia, Aragón, Castilla y Breizh participen nel XIV Festival Internacional de la Gaita (FIG) na capital maliaya, que vibra tolos años con esti certame. Bandes de gaites, grupos folk y cantantes de tonada conformen un programa “que permite ver coses diferentes, como una bagad bretona o una banda de gaites aragonesa”, esplica Muñiz, qu’anima a tolos asturianos y visitantes a averase a Villaviciosa a disfrutar de les numberoses actividaes previstes.

El FIG arranca esta tarde nel Centru Cultural San Xuan de Capistrano con un taller, con comienzu previsu pa les 17 hores, sobre ‘Problemes y axustes na gaita asturiana’, impartíu por Pelayo Fernández y na que ye necesaria inscripción al tener les places llendaes. A esceición de los talleres, toles actividaes son de baldre, como’l conciertu d’esta nueche (22 hores) de José Manuel Tejedor nel Teatru Riera, al que va siguir ún de La Casa Mariella nel Pub Trasgu, onde darréu va haber escenariu abiertu.

La Nueche en Danza va protagonizar la xornada del vienres (22 hores), mentes que’l sábadu ta programada la Nueche Folk (22.30) colos castellanos La Musgaña, Spanta la Xente y Startijenn, "una banda mui potente del folk bretón", destaca Muñiz. Tamién n’El Pelambre’l sábadu, a les 19 hores, va celebrase’l XIV Alcuentru de Bandes de Gaites nes que van participar la banda llocal y los veteranos de la mesma, la Banda Gaitas El Trasno (Cuaña), la Banda de Gaitas Ximiela (Louro, Galicia), la Banda de Gaitas de Boto Aragonesas (Zaragoza, Aragón) y la Bagad Kevrenn Alré (An Alre, Breizh).

Pal domingu ta previstu’l IV Certame FIG de Tonada Asturiana (18 hores) y el VIII Concursu de Gaiteros Memorial José Huerta. Son sólo dalgunes de les actividaes más destacaes de les cuatro xornaes, con un programa qu’inclúi otros munchos eventos, como la XXII Fiesta de la Sidre’l sábadu o les Xornaes Gastronómiques Gaiteres mientres tol festival.

Na semeya, ambiente na edición pasada del FIG mientres l'actuación de Vallarna na Nueche Folk.