El domingu cuérrese'l V Trail de Pena Ubina

Trátase de la cuarta prueba puntuable pa la Copa d'Asturies en Llinia.

Con un percorríu de 21 quilómetros ensin pisar asfaltu nin pistes, y un desnivel de 4.200 metros, el V Trail de Pena Ubina tien salida y llegada en Tuiza Riba. La carrera algamó'l tope d'inscripciones qu'autoriza'l Parque Natural de Pena Ubina-La Mesa, asitiáu en 300, de los que'l 20 por cientu son corredores de fuera del país. Tamién destaca l'aumentu del 20 por cientu de participación femenina.

La salida de los deportistes va dase a les 9 hores y el tiempu estimáu pa completar el percorríu ta en menos de 3 hores. Esti trail ye puntuable pa la Copa d'Asturies en Llinia de carreres de montaña qu'entama la FEMPA y que lidera anguaño Xuan Calderón (Club Avientu Solorunners) en categoría masculina y Ana Cristina Aguado (Reino Astur), en femenina.