Cámara y Gutiérrez Lueje ganen en Tuiza Riba

El burgalés y la de Cangues d'Onís foron los más rápidos nel IV Trail de Pena Ubina.

Raúl Cámara, del Mizuno Solorunners, completó los 21 quilómetros de percorríu, con un desnivel de 4.200 metros, nun tiempu de 2 hores, 43 minutos y 16 segundos, superando en 4 minutos y 11 segundos a Ander Cangas (Club Goiena) y en 5 minutos y 50 a José Luis Camblor (Xendastur). La primer muyer foi Claudia Gutiérrez Lueje, del Avientu, con una marca de 3 hores, 29 minutos y 38 segundos. Completaron el podiu na categoría Sonia Regueiro (Club Goiena), con 3 hores, 31 minutos y 34 segundos, y Noelia Ortiz (Cronoastur), con 3 hores y 36 minutos de rexistru.

De forma paralela a esta prueba con salida y llegada en Tuiza Riba, puntuable pa la Copa d'Asturies en Llinia de carreres de montaña qu'entama la FEMPA, celebróse la 'Carrerina', de 15 quilómetros de llargor. Los ganadores de la mesma foron Andrés García Blanco (Avientu Solorunners), con un tiempu de 1 hora, 56 minutos y 50 segundos, y Adriana Suárez López (Toscaf Recta Final Trail), que terminó la prueba en 2 hores, 31 minutos y 26 segundos.

La quinta de les seis pruebes de la Copa d'Asturies va ser el VIII Resistencia Reino Astur, que va celebrase en Nembra'l 16 de xunetu. 

Semeya de Javier Fernández Blanco