El DMR va estender la so actividá per tol mes d’ochobre

El XII Asturies nun Escaez va celebrase de baldre n’Uviéu’l día 10 cola presencia de Brutus Daughters, Skontra, K-Nalón y Adizión Etílika. La xornada previa va haber una Nueche en Danza.

Darréu pretende esti añu potenciar el Día de la Mocedá Revolucionario (DMR) con actividaes mientres tol mes d’ochobre, “tiempu de reivindicación y d’alcordanza”, anque les xornaes centrales van ser el vienres 9 y el sábadu 10. Asina, el grupu folk Caldos y Os Rabizos, amás de los grupos de baille Xeitu y Fitoria, van protagonizar una Nueche en Danza nel día inaugural del DMR que, al igual que’l restu d’eventos, van tener como seder la plaza Porlier. “L’envís nun ye otru que combinar ociu alternativu cola recuperación de formes culturales tradicionales del nuesu país, carauterizaes por un calter comuñal bien útil pa siguir faciendo pueblu na Asturies d’anguaño”, apunten dende la organización.

La mañana del sábadu va tar dedicada a los xuegos tradicionales (12.30 hores), pa depués entamar una fabadona popular (14.30 hores) “cola que siguir texendo llazos y espardiendo la reivindicación de la nuesa cultura como elementu tresformador”. A les 19 hores ta previsto un pasucais “pol futuru de la mocedá y escontra la emigración forciada”, cola participación de toles delegaciones internacionales convidaes al DMR, y, a continuación, va desendolcase un actu políticu.

Yá de nueche, a les 21 hores, ta previsto’l XII Asturies nun Escaez, conciertu que, como novedá, esti añu va ser de baldre. Nél van participar les bandes asturianes Skontra, K-Nalón y Adizión Etílika, a les que se sumen los madrilanos Brutus Daughters, formación que fai punk-folk.

Esta programación adelantada por Darréu va ampliase en feches próximes, según anuncia la propia organización moza.