“El Día’l Traxe’l País ye una xornada pa llucir el traxe por gustu”, destaca Suárez

Grau ta preparándose p’acoyer el domingu’l Día’l Traxe’l País, cuando los bien vistíos s’averen a la villa moscona. “Ye una xornada pa llucir el traxe por gustu”, diz Alberto Suárez, direutor del concursu ‘Indumentaria’, qu’esti añu tien récor de participación, calidá y rigor.

49 persones “de tolos puntos d’Asturies” tán inscrites nesti certame que reparte premios de 200 euros y una lliga de llana esclusiva pa los ganadores de les dos categoríes –home y muyer–, y de 150 y 100 pa los segundos y terceros, de manera respeutiva. A ellos hai que sumar a otros casi trés centenares de persones que se calcula que van llevar a títulu particular el so traxe nuna fecha “yá afitada nel calendariu festivu de Asturies”.

La empresa de xestión cultural, comunicación y diseñu gráficu B. Alto, en collaboración col Conceyu de Grau y Caja Rural de Asturias, que financia los premios, ye la impulsora d’esta xornada que nació “pa poner de relevancia’l traxe’l país, poner l’atención nuna vistimienta adecuada, basada nos traxes asturianos de la segunda metá del sieglu XIX, y premiar a aquelles persones que visten con rigor históricu”, esplica Suárez. Grabaos, fotografíes o testimonios de la época sirven pa conocer cómo yeren aquellos traxes, un patrimoniu cultural de gran importancia non siempre valoráu como se debe.

‘Indumentaria’ ye l’eventu sobre’l que xira’l Día’l Traxe’l País, que tamién tien espaciu pa la música y les actividaes infantiles. “Ye un desfile de moda, non folclóricu”, apunta’l so direutor, qu’especifica que “nun se mira la guapura de les persones que lleven los traxes, sinón los propios traxes: la confección de les prendes, el xeitu nel vistir, la combinación, que nun s’amiesten elementos de traxes de diferentes status social, los complementos…”.

Entrugáu sobre si l’entamu del Día’l Traxe’l País y ‘Indumentaria’ ta provocando que les persones tengan más procuru a la hora de vistir traxes tradicionales, Suárez considera que sí, que “ta sirviendo de referencia”. “El concursu val munchu pa deprender. Cada persona viste a la so manera dientro de la muncha variedá q’hai, pero ye importante'l bon vistir”, apunta.

Dende les 11 hores

El comienzu del concursu ta previstu pa les 11 hores na plaza los Dolores, momentu nel que los participantes en ‘Indumentaria’ van ser valoraos pol xuráu. A les 12.30 hores, nel mesmu llugar, va celebrase’l desfile pa disfrute del públicu que s’avere a Grau’l domingu, día de mercáu na villa moscona.

Fuera de concursu van llucise cinco traxes de Cabranes, reproducciones de los qu’hai cien años se vistíen en Torazu, ellaboraos esti añu pa ofrecer los ramos n’El Carmen al traviés del entamu d’un taller, lo que pa Suárez “supón un exemplu” de recuperación a partir d’una rigurosa documentación. La música tradicional va acompañar tol desfile gracies a les actuaciones en direuto de la pareya de gaita y tambor que formen Arsenio González y Manolo Díaz, el violinista Dolfu Fernández y l’acordionista Octavio Trapiello, y Xosé Antón Fernández ‘Ambás’ y Ramsés Ilesies.

Yá de tarde, Herbamora, la panderetera solista llocal Leticia González de Baselgas (componente de L-R), Santi Galguera y Manolín El de Parres, y Cantaruxare van facer baillar a los presentes dende les 17 hores na plaza’l Mercáu. Mentes, la reciella va poder participar nun taller de baille tradicional y en ‘Menudu traxín’, actividá pa mayores de 4 años que dende les 11 hores va permitir conocer y disfrutar de xuegos tradicionales na plaza de la Casa Conceyu.

Na imaxe, una participante en 'Indumentaria' con numberoses persones vistíes ente'l públicu. Semeya obra d'Ojos de Hojalata.