El Día’l Traxe’l País va vivir la edición con más participación y de más calidá

Más de 300 persones a títulu particular van participar nel Día’l Traxe’l País y nel concursu ‘Indumentaria’, que va celebrase esti domingu con Grau como sede un añu más y espaciu tamién pal baille tradicional. La participación, poro, va ser mayor que nes dos ediciones anteriores, con vistíos de mayor calidá y rigor históricu.

‘Indumentaria’ ye’l mayor atractivu del Día’l Traxe’l País qu’entama la empresa de xestión cultural, comunicación y diseñu gráficu B. Alto en collaboración col Conceyu de Grau y Caja Rural de Asturias. Esti certame va comenzar a les 11 hores na plaza los Dolores cola convocatoria de los participantes énte’l xuráu pa darréu, a les 12.30 hores, desfilar pal públicu nesi mesmu llugar dar pasu a la entrega de distinciones y a la organización d’una danza prima na plaza La Panerina.

Esti concursu trátase de “un eventu único n’Asturies, una pasarela de moda que destaca pola calidá y rigor de los traxes tradicionales que se llucen”, con vistimientes de la segunda metá del sieglu XIX representativos de tolos estamentos sociales y zones xeográfices del país. Una iniciativa que tien como oxetivu enseñar lo meyor de la indumentaria tradicional asturiana y fomentar la escelencia nel vistir, amás de reivindicar esti patrimoniu cultural “munches veces escaecíu nes coleiciones museográfiques asturianes que s’ocupen de los temes etnográficos y antropolóxicos”.

La música tradicional tamién tien un protagonismu especial en ‘Indumentaria’, cola actuación en direuto de la pareya de gaita y tambor que formen Arsenio González y Manolo Díaz, el violinista Dolfu Fernández y l’acordionista Octavio Trapiello, a los qu’hai que sumar a Xosé Antón Fernández ‘Ambás’ y Ramsés Ilesies, que van interpretar delles pieces. Como novedá, mientres el desfile la organización va dedicar nel apartáu de Muestra –fuera de concursu– un llugar d’honor a los traxes que se llucieron esti añu n’El Carmen de Torazu, que son un reproducción de los que fai, al menos cien años, vistíen nesta población del conceyu de Cabranes pa ofrecer los ramos.

El ganador del concursu en cada categoría, home y muyer, va llevar una recompensa de 200 euros y una lliga de llana esclusiva. Mentes, los segundos van recibir 150 euros y los terceros, 100 euros.

Baille asturianu

Un escenariu instaláu na plaza’l Mercáu va acoyer pela tarde, dende les 17 hores, a músicos tradicionales de primer nivel como Herbamora, la panderetera solista llocal Leticia González de Baselgas (componente de L-R), Santi Galguera y Manolín El de Parres, y Cantaruxare. Toos ellos van facer danzar a los presentes hasta l’atapecer.

Otra manera, los más pequeños tamién tienen güecu nel Día’l Traxe’l País, col espaciu ‘Menudu traxín’ pa mayores de 4 años que, dende les 11 hores na plaza la Casa Conceyu va permitir conocer y disfrutar xuegos tradicionales. Tamién va impartise un taller de baille tradicional a cargu del Grupu Folclóricu Prau Llerón, de Mieres.

Semeya propiedá d'Ojos de Hojalata Fotógrafos.