El día de San Xuan, salen les xanes a baillar

|
Foguera de San Xuan Cimavilla 2016

Cientes de fogueres van prender n’Asturies na medianueche d'esti vienres pa celebrar San Xuan. La nueche más máxica del añu, na que'l fueu y l'agua son protagonistes, ufre munches opciones d'ociu a lo llargo de tol país. ¿Cuála te presta más?

La mayoría de ciudaes y pueblos d'Asturies –al igual que munchos munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.

Amás ye l’únicu momentu d’atopar la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va contar cola presencia de l’actuación de Blus Probes, la banda del televisivu Alberto Rodríguez. La celebración principia a les 21 hores –enantes, a les 20 hores, van baillar Los Xustos na Plaza Italia– col enramáu de la fonte de Pelayo por parte d’Andecha de Cultura Tradiciona Na Señardá y va siguir nel escenariu de la sablera coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá, como Ciares, Mareo, Cimavilla o La Calzada en L’Arbeyal, tamién celebren esta nueche máxica nun ambiente más vecinal.

Otres celebraciones

Una cita clásica ye de la Corvera, en Tresona, la nomada 'Foguera d'Asturies', qu’estrena’l títulu de Fiesta d’Interés Turísticu Autonómicu, pero que dende hai unos años dio un xiru y alloñóse un tantu de la tradición al incorporar una orquesta y caltener la fiesta de música electrónica. La folixa, dedicada esti añu a la minería, va principiar a les 22.30 hores con un ‘Conciertu a la Deva’ protagonizáu por Bras Rodrigo, pa depués dar pasu a un espectáculu de Producciones Nun Tris, tamién de temática alredor de la mina. Tres el prendíu d’una foguera especial a medianueche, la celebración va siguir con un 'Conciertu a Belenos' con Dixebra y la orquesta Clan Zero.

Mieres, mentes, celebra les sos fiestes de San Xuan, y Uviéu entama la foguera otru añu onde la Catedral, con un ritual máxicu dende les 23 hores. En L'Entregu, el Centru Social Autoxetionáu La Semiente organiza la foguera del pueblu nel prau xunto al campu de fútbol y una queimada popular, que se ve reforciada nesta ocasión con un festival de música dende les 20.30 hores con Salón Bombé y UHP, enantes del prendíu con un conxuru sobre la corrupción, y La Tarrancha y Skontra, depués.

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa. Tamién van poder disfrutar del cuentu animáu 'L'encantamientu' que se desendolca en San Xuan.

Contador Estadistiques