El día de San Xuan, salen les xanes a bailar

Cientos de fogueres van prender n’Asturies na medianueche d'esti vienres pa celebrar San Xuan. La nueche más máxica del añu, na que'l fueu y l'agua son protagonistes, ye esperada por toles asturianes y asturianos, que yá engalanen les fontes.

La mayoría de ciudaes y pueblos d'Asturies –al igual que munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista, que cai'l 24– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua, ta entovía mui viva nel país.

Amás ye l’únicu momentu d’atopar la flor d’agua, que surde per un instante colos primeros rayos de sol de la mañana de San Xuan según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes, d’ehí’l refrán qu’entitula esta información: “El día de San Xuan, salen les xanes a bailar”.

Una celebración que recupera la normalidá depués de dos años con restricciones pola situación sanitaria. Güei l’únicu enemigu va ser l’agua, que va cayer sobre manera pela tarde, cola esperanza de que dea una tregua pela nueche.

El bon tiempu garantiza les celebraciones entamaes esta nueche por Conceyos, vecinos o families. A medianueche van prender les fogueres, que van acompañase d’actividaes, principalmente musicales, munches d’elles de calter tradicional, de les que recoyemos nesta información les principales.

Felpeyu en Corvera

La ‘Foguera d’Asturies’ ye’l nome cola que se promociona la de Corvera, catalogada como Fiesta d’Interés Turísticu Autonómicu. Con una importante tradición –la primer edición foi nel 1992– y asistencia de públicu, va arrancar la ‘Nueche Celta’ en Tresona con Felpeyu a les 22.30 hores, pa siguir a les 23.30 hores con un pasucais de la Banda de Gaites de Corvera qu’abre’l ritual de quema de la foguera diseñada pol artesanu avilesín Alberto Colino baxo'l nome 'Suaños' que ta coronada por una recreación del madreñoxiru de les histories de Pinín, Telva y Pinón, y siguir la folixa con Blus Probes y la Orquesta Karine hasta bien entrada la madrugada.

La otra gran foguera multitudinaria, la que más, ye la de Xixón na sablera d’El Natahoyo, que, sicasí, perdió nos años últimos el conciertu folk al que siguía’l prendíu a medianueche. Sí se caltién l’engalanamientu de fontes per tol conceyu y los pasucais de bandes de gaites, a les 21 hores de la Banda de Gaites La Magüeta y a les 21.30 hores de la Banda de Gaites Jovellanos.

Yá sobre l’escenariu, van actuar les bandes Conceyu de Xixón (22.15 hores), Noega (22.45) y Villa de Xixón (23.15). Los fuegos artificiales tán previstos pa les 23.50 hores, pa siguir cola quema de la foguera a la medianueche y la danza prima, y, depués, una orquesta, Cayenna.

Pela so parte, otros barrios de la ciudá, como La Camocha, viven esta nueche máxica nun ambiente más vecinal. Mientres, en Mareo celebren les sos fiestes con Tekila.

Mieres tamién festexa San Xuan con un ampliu programa nel que rescampla l’enrame a les 20 hores y les actuaciones en dellos puntos de la villa de L’Artusu, Ruxidera, la Banda Gaites Villa de Mieres y Prau Llerón, que va repetir na quema de la foguera na plaza de la Casa Conceyu. Depués va haber un desfile de fueu y van tocar La Cabra Mecánica y Pasito Show nel parque Xovellanos.

La Tarrancha en L’Entregu y Calea en Llugones

En L'Entregu, el Centru Social Autoxestionáu La Semiente organiza la foguera del pueblu nel prau xunto al campu de fútbol Nuevo Nalón. Esti añu va ser cola fórmula de festival baxo’l nome de ‘Que Nun Apare La Foguera L’Entregu’, con apertura del chigre a les 19.30 hores, un ‘L’Escurecer en Danza’ a les 20.30 hores y los conciertos d’Ilustres Patilludos (22.40 hores) y La Tarrancha (00.20), pa pesllar la folixa Allanai Sound System.

Na celebración d’Uviéu, nomada ‘San Juan’, ye pa destacar los talleres infantiles de danza y baille, d’instrumentos tradicionales, de muestra y diseñu d’indumentaria tradicional y d’ellaboración de corones de flores que tienen llugar a les 17 hores na plaza de Daoiz y Velarde, y les actuaciones nel Antiguu a les 20 hores de les bandes de gaites Vetusta, Xácara y Centro Asturiano de Oviedo, y de l’Asociación Folklórica La Hedra, amás del recital de canción asturiana nel Campillín a les 17 hores. La foguera va asisitiase esti añu na plaza de la Casa Conceyu y la verbena va ponela nel Campillín Grupo Límite.

Con motivu de San Xuan, en Llugones actúa Calea, el tríu formáu por Leticia Baselgas, Silvia Quesada y Rubén Bada. Ye a les 19.30 hores nel Centru Polivalente Integráu, con entrada llibre.

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.