El CTA xune con una ruta nueva d'autocar Siero y el campus de Xixón

La llinia Ḷḷuarca-A Veiga va reforzase con una frecuencia más de llunes a vienres.

Los estudiantes universitarios de Siero nel campus de Xixón van poder beneficiase esti cursu d'una ruta d'autocar que va partir d'El Berrón, de l'avenida d'Uviéu númberu 25, a les 8.05 hores pa facer paraes en La Pola Siero y, yá en Xixón, na Escuela de Peritos, en Marina, nel Aulariu y na Llaboral. La vuelta va tener llugar a les 14.10 hores.

Ye la principal novedá del Consorciu de Tresportes d'Asturies (CTA) pa esti cursu, con arranque confirmáu pal 11 de setiembre. Otra manera, va reforzar tamién dende esi día la llinia ente Ḷḷuarca y A Veiga con una frecuencia más, ruta que va operar a les 7 hores, con vuelta a les 14.30 y paraes nos conceyos de Valdés, Navia, Cuaña, El Franco, Tapia, Castropol y A Veiga, y serviciu a los centros educativos Carmen y Severo Ochoa (Ḷḷuarca), Galileo Galilei (Navia), Marqués de Casariego (Tapia) y Elisa y Luis Villamil (A Veiga) y al Hospital de Xarrio.

Ésta compleméntase cola puesta en marcha l'añu pasáu que tien salida a les 7 hores d'A Veiga y regresa a Ḷḷuarca a les 14,30. Amás los usuarios tamién disponen d'otres seis frecuencies diaries por sentíu pa esti percorríu, ente les 6 y les 21.45 hores, dientro de la llinia Ribadeo-Uviéu.