El Conseyu de Ministros retira la obligatoriedá del usu de la mázcara n'interior 2 años depués

El 21 de mayu del 2020 entró a valir esta midida pa lluchar contra la COVID-19, que dexa de tar vixente'l miércoles pa "avanzar hacia la normalidá", apuntó la vocera Isabel Rodríguez.

La mázcara dexa de ser obligatoria n'espacios públicos d'interior. El Conseyu de Ministros dio'l preste esta mañana a esta decisión avanzada pol Ministeriu de Sanidá y mañana, llueu de la espublización nel Boletín Oficial del Estáu (BOE), esti elementu proteutor contra'l coronavirus SARS-COV-2 va quedar relegáu a espacios mui concretos.

Éstos son los centros hospitalarios, como ambulatorios o farmacies, y sociosanitarios, como les residencies de mayores, tanto pa los trabayadores como pa los visitantes entrambos casos, anque non pa ingresaos –sacante cuando salgan del so cuartu– y internos. Tampoco nun se pueden retirar les mázcares nos viaxes en tresporte públicu y eventos deportivos multitudinarios.

Nel centru de trabayu será cada empresa la que decida, mentes que nes escueles nun van ser obligatories.

Na semeya, Rodríguez y la ministra de Sanidá, Carolina Darias.