El conseyu de Gobiernu aprobó la toponimia de Sariegu, Cabranes, Villaviciosa y Bimenes

Los cuatro conceyos de la Comarca de la Sidra pasaron esta mañana'l trámite definitivu pa l'aprrobación de los sos topónimos tradicionales en Conseyu de Gobiernu. Ramón d'Andrés, director de Política Llingüística, estima qu'otros dos conceyos más podríen pasar el trámite enantes d'acabar l'añu.

El Conseyu de Gobiernu d'Asturies, qu'aconceyó esta mañana na sede de Presidencia n'Uviéu, aprobó los espedientes polos que s'aprueben los topónimos tradicionales de los conceyos de Sariegu, Cabranes, Villaviciosa y Bimenes, cuatro de los conceyos qu'igüen la Comarca de la sidra xunto con Nava y Colunga. El director de la oficina de Política Llingüística, Ramón d'Andrés, que s'alcontraba esta mañana en Cadavéu, onde la Xunta de Toponimia aconceyaba coles autoridaes valdesanes pa tratar precisamente l'espediente toponímicu d'aquel conceyu, espresó'l so contentu por esti nuevu pasu na normalización de la toponimia asturiana y dixo a Asturies.com qu'esiste una riestra de conceyos que yá tienen terminaos y incluso aprobaos a nivel municipal los sos espedientes, que yá namás tan pendientes de pasar el trámite final en Conseyu de Gobiernu. Ente estos conceyos taríen Colunga, La Ribera, Morcín, Riosa y, especialmente, Nava y Ayer, que podríen ser los dos siguientes en recibir el preste definitivu del Gobiernu, dalgo que podría asoceder enantes de que remate l'añu en cursu.

La de güei ye la tercer tanda de topónimos que s'apreben en Conseyu de Gobiernu nesta llexislatura, na qu'echó a andar la xunta de Toponimia. El 21 d'abril Carreño, el Franco y Llanes estrenaron el llistáu de conceyos que víen los sos nomes de llugar tradicionales oficializaos por mandatu gubernamental. El procesu pa estos trés pioneros fízose esperar más de lo que se contaba, pero entovía hebo d'esperar hasta'l 7 de xunetu pa que los trés siguientes, Gozón, L.lena y Llangréu ficieren otru tanto. Cuatro meses dempués, la nómina de conceyos cola so toponimia aprebada llega yá a los 10 de los 78 que tien el país.

Otramiente, la Xunta de Toponimia sigue col so llabor, revisando los nomes de llugar de los conceyos d'Asturies en collaboración coles autoridaes y espertos locales. Nes últimes selmanes la Xunta ta llevando alantre sesiones intensives de trabayu en Xixón con vistes a rematar definitivamente l'espediente del conceyu, nel que vien trabayándose dende enantes del branu, mientres que la reunión d'esta mañana en L.luarca, nel simbólicu escenariu de la casa natal del Padre Galo, valió pa entamar a definir l'espediente toponímicu del conceyu. D'Andrés apuntó que nun va haber mayor problema p'apautar esti espediente por ser un conceyu yá mui trabayáu por estudios anteriores y polos espertos de l'Academia de la Llingua, al empar que sorrayó'l bon ambiente de trabayu na reunión d'esta mañana a la qu'asistieron l'alcalde valdesán Juan José Fernández Tereiro, la conceyala de cultura Carmen Teresa García Arroyo, la escritora y Académica de la Llingua Esther García, Jesís Suárez, del Archivu de la Tradición Oral d'Asturies, la presidenta de l'Asociación "La Regalina" María Rico, l'alcalde de Cadavéu Félix Menéndez y el técnicu del conceyu Guillermo Rodríguez. La poetisa valdesana Nené Losada Rico, decana de les lletres asturianes, que taba convidada, nun pudo asistir por razones de salú.