El Conceyu de Xixón convoca una beca pa la Oficina de Normalización Llingüística dotada en 6.000 euros

El 15 de marzu ye’l día caberu pa presentar la documentación necesaria p’aspirar a una beca de formación convocada pola Oficina de Normalización Llingüística de Xixón. Ésta ta dotada en 6.000 euros y termina’l 31 d’avientu d’esti añu.

Según espliquen na convocatoria entamada pola Fundación Municipal d’Educación, Cultura y Universidá Popular, el llabor qu’ha de facer la persona qu’algame la beca ye la torna y correición de documentos, la collaboración nel diseñu y execución de programes, actividaes y campañes de promoción del idioma, y la  realización de trabayos de campu venceyaos cola toponimia menor del conceyu. Pa poder acceder a esti puestu, les trés condiciones son contar cola nacionalidá de dalgún estáu miembru de la Xunión Europea, contar con una Llicenciatura o diplomatura cola titulación universitaria d’Especialista o Espertu/a en Filoloxía Asturiana obtenida nos cinco años últimos, y nun tener nengún otra rellación llaboral o beca.

Les persones interesaes nesti puestu han de presentar en cualquier de los rexistros del Conceyu de Xixón la documentación qu’empobinen les bases del concursu, un documentu acreditativu de la persona que solicita la plaza y un currículu detalláu y acreditáu. El becariu que consiga’l puestu tendrá al menos seis hores de trabayu en díes llaborables nun horariu por establecer.